Azərbaycan Dillər Universitetində (ADU) Azərbaycan ilə Pakistan arasında diplomatik münasibətlərin qurulmasının 30 illiyinə həsr olunmuş sərginin iştirakçılarının mükafatlandırılma mərasimi keçirilib.
Tədbirdə Pakistanın Azərbaycandakı səfiri Bilal Haye, deputat Qənirə Paşayeva və ADU-nun rektoru Kamal Abdulla iştirak ediblər.
Pakistan səfiri bu tədbirin Azərbaycan və Pakistan arasında diplomatik münasibətlərin qurulmasının 30-cu ildönümünə həsr olunmuş tədbirlər silsiləsinin ilk tədbiri olduğunu söyləyib və sərgidə iştirak edən hər kəsə minnətdarlığını bildirib.
Deputat Qənirə Paşayevanın sözlərinə görə, Pakistan Azərbaycan üçün sadəcə dost deyil, qardaş ölkədir: “Azərbaycan Pakistanla münasibətlərin inkişafına xüsusi diqqət ayırır. Pakistan Türkiyədən sonra Qarabağ müharibəsi zamanı Azərbaycana bütün beynəlxalq platformalarda ən çox dəstək vermiş ikinci dövlətdir”.
O, həmçinin yaxın zamanlarda Pakistanın ali təhsil müəssisələrindən birində Azərbaycan dili və ədəbiyyatı mərkəzinin açılacağını bildirib.
Daha sonra sərgidə əsərləri nümayiş olunmuş müəlliflərin mükafatlandırılma mərasimi keçirilib.
