Bakı Milli Geyim Evində mətbuat konfransı keçirilib.

Geyim Evinin rəhbəri Könül Vəlibəyli media nümayəndələri və geniş ictimaiyyət üçün 14 ildir aktiv və uğurlu fəaliyyətdə olan Bakı Milli Geyim Evinin hesabatını verməklə yanaşı, ən son yeniliklərdən danışıb.

Bildirib ki, 14 ildir fəaliyyət göstərən Bakı Milli Geyim Evi Azərbaycanın milli-mənəvi dəyəri olan geyimlərimizin hazırlanmasında, dünyada tanıdılmasında və təbliğində önəmli rola sahibdir: "Uzun illər ərzində dünyanın müxtəlif ölkələrində ölkəmizi təmsil edən qurumlar və səfirliklərlə uğurlu əməkdaşlıqlar sayəsində onların da dəstəyilə fərqli ölkələrdə dəfilə və sərgilərimiz keçirilib. Həmçinin istər ölkə daxilində, istərsə də, ölkə xaricində bir neçə dəfə Mədəniyyət Nazirliyi və Heydər Əliyev Fondunun təşkilatçılığı ilə müxtəlif dövlət tədbirləri, eləcə də, rəqs və mahnı ansambllarımız, teatrlarımız üçün milli geyimlər hazırlamışıq. Sevindirici haldır ki, Rusiya, Türkiyə, Amerika, Cənubi Koreya, Ərəb ölkələri, Çin, Fransa, Özbəkistan və sair kimi ölkələrdə dəfilə və sərgilərimiz baş tutub. Bu gün Bakı Milli Geyim Evinin hazırladığı libaslar ölkə və dünya muzeylərində sərgilənir".

K.Vəlibəyli qeyd edib ki, yarandığı ilk gündən etibarən Bakı Milli Geyim Evinin kolleksiyasında önəmli yer tutan geyimlərdən biri də Şuşa-Qarabağ geyimləridir. Kollektiv 2020-ci ildə 44 günlük Vətən müharibəsi nəticəsində qazanılmış böyük Zəfərimizə, eləcə də 2022-ci il “Şuşa İli”nə ithaf olaraq Qarabağ və Şuşanın yeni geyimlərini, araqçınlarını hazırlayırlar.

Daha sonra Geyim Evinin rəhbəri jurnalistləri maraqlandıran sualları cavablandırıb.