Milli kinomuzda özünəməxsus dəsti xətti ilə seçilən rejissor, Xalq artisti Tofiq Tağızadənin çəkdiyi filmlər bu gün də sevilərək baxılır. Fevralın 7-də Azərbaycan kinosuna “Uzaq sahillər”dən baxan sənətkarın doğum günüdür.

Tofig Tağızadə kinoya ilk dəfə “Görüş”lə gəlib. Elə ilk filmi ilə də sənətə öz dəst-xəttini gətirib. Rejissor Azərbaycan və Özbəkistan pambıqçılarından bəhs edən filmində fikri pambığa yönəltmir. Əksinə, yozumuna bir az yumor qatıb, obrazlarını pafoslu dialoqdan uzaq tutaraq tamaşaçıya daha yaxın edir.

İlk filmi ilə uğurun qapısını açan rejissor 50-ci illərin sonuna kimi “Uzaq sahillərdə” və “Əsl dost” filmlərini çəkməklə kinomuza milli ruh qatıb. Tofiq Tağızadə "Kitabi Dədə Qorqud" dastanının motivləri əsasında yazıçı Anarın yazdığı ssenariyə ekran həyatı verməklə, xalqımızın tarixi yaddaşının bərpasında, milli kimliyimizin tanıdılmasında böyük rol oynayıb.

Rejissor quruluş verdiyi filmlərdə iri planda qəhrəmanlarını gözləri vasitəsilə danışdırmağın ustasıydı. O, göz-söz oyunundan doymurdu. Demək olar bütün filmlərində fokusu obrazlarının gözünə tuşlamaqla, onların daxili aləmlərinə sirayət edirdi.

40 ildən çox milli kinomuza xidmət edən Tofiq Tağızadə ümumilikdə 14 bədii film çəkib. Hər biri sənət əsəri olan bu filmlər gənc rejissorlar üçün həm də ustad dərsidir. Onu kinoya Çarli Çaplinin filmlərinə olan böyük sevgisi gətirib və o, sevə-sevə ömrünü kinolentə bağışlayıb.

Ülviyyə Heydərova