İstanbulda Azərbaycanın 44 günlük Vətən müharibəsində əldə etdiyi şanlı Zəfərə həsr olunan “Qızıl alma - Şuşanın oyanışı” tamaşası nümayiş etdirilib. Səhnə əsərində Şuşanın azad olunması zamanı Azərbaycan ordusunun göstərdiyi şücaətdən bəhs edilir.

Azərbaycan müasir dövrünün ən parlaq səhifəsi sayılan Şuşanın işğaldan azad edilməsi tarixi ilə bağlı İstanbulda təqdim olunan “Qızıl alma-Şuşanın oyanışı” tamaşası həm də iki ölkə arasında mənəvi bağlılığın növbəti təcəssümü idi. Tamaşanın rejissoru Ümit Anaç bu səhnədə zəfər tarixi ilə bağlı əsərin nümayişindən məmnunluqla danışdı. Bildirdi ki, iki il əvvəl Xocalı soyqırımına həsr olunan tamaşada düşmən obrazını canlandırırdı. Indi hadisələr tamamilə əks istiqamətdə cərəyan edir, həm tarixdə, həm də səhnədə...

Gültəpə Mədəniyyət Mərkəzində təqdim edilən səhnə əsərində 8 nəfərlik aktyor heyəti rol aldı. Ssenari müəllifi Sevinc Mehrəliyeva, rejissorları isə Ümit Anaç və Şahin Deyirmenci, prodüser-koordinatoru Ayhan Ünlü olan tamaşada rolları Ümit Anaç, Fatma Ayaz, Dilfuza Yorova, Emrehan Yavuz, Tülay Kurt, Sedat Ustaoğlu və Gökcan Yılmaz ifa etdilər.

“Oğuzlar üçün hansı tərəfə gedərlərsə-getsinlər Zəfər əldə edilmədən əvvəl Qızıl Alma” şüarı ilə təşkil edilən tamaşada milli musiqi elementlərindən də istifadə olundu. Layihələrin davam etdirilməsi və eyniadlı tamaşanın Azərbaycanda da nümayişi nəzərdə tutulub.