Polşa Respublikasının Birinci xanımı Aqata Korbhauser-Dudanın himayəsi altında “Polşada akkreditə olunmuş Diplomatik Missiya Rəhbərlərinin Xanımları” cəmiyyətinin (SHOM) təşkilatçılığı ilə Polşanın Milli Olimpiya Stadionunda ənənəvi Beynəlxalq Milad Xeyriyyə Bazarı keçirilib.
Tədbirdə Polşada akkreditə edilmiş əksər diplomatik nümayəndəliklər, ölkədə fəaliyyət göstərən xeyriyyə cəmiyyətləri, fərdi sahibkarlar iştirak ediblər.
Azərbaycanın Polşadakı səfirliyi Azərbaycanın Polşada akkreditə edilmiş Mərkəzi Avropa Ölkələri üzrə Ticarət nümayəndəsinin ofisi və Varşavada fəaliyyət göstərən milli mətbəx təamlarını təqdim edən iaşə obyektləri ilə birgə ölkəmizi tədbirdə təmsil ediblər.
Azərbaycan stendində ölkəmizdə istehsal olunan müxtəlif növ spirtli və spirtsiz içkilər, şirniyyat növləri və mətbəx nümunələri, həmçinin kəlağayılar, suvenirlər və digər mallar satışa çıxarılıb.
Azərbaycan stendi xüsusi olaraq üzərində Azərbaycan bayrağı, gerbi və polyakca adının əks olunduğu süfrə üzərində qurulub və stendin arxa hissəsində “Made in Azerbaijan” brendinin və Azərbaycan turizminin təbliği ilə bağlı posterlər quraşdırılıb.
Azərbaycan stendi xeyriyyə bazarı ziyarətçilərinin xüsusi marağına səbəb olub.
Xeyriyyə tədbirinin rəsmi hissəsi Polşa Respublikasının Birinci xanımı Aqata Korbhauser-Dudanın təbrik məktubunun səsləndirilməsi və Polşa Xarici İşlər Nazirliyinin Diplomatik Protokol Departamentinin direktoru Marek Şepanovskinin çıxışı ilə başlayıb. Daha sonra Milad Xeyriyyə Bazarının açılışı elan edilib.
Xeyriyyə tədbirinin bədii hissəsində ölkəmizi Polşada yaşayan xoreoqraf Çinarə Məmmədova və tenor Tərlan Şahbazi təmsil ediblər. Ç.Məmmədova “Sarı gəlin”, “Uzundərə” kimi Azərbaycan milli rəqslərini ifa edib, tenor T.Şahbazi dahi Azərbaycan şairi Nizami Gəncəvinin 880 illiyi ilə əlaqədar Nizaminin əsərlərinin motivləri əsasında “Sənsiz” əsərini, sonra “Sarı gəlin” xalq mahnısını oxuyub. İfalar tədbir iştirakçıları tərəfindən rəğbətlə qarşılanıb.
Səfir Nərgiz Qurbanova tədbir zamanı Polşanın “TVN” televiziya kanalına müsahibə verib.
