Bakıda teatr mövzusuna həsr edilmiş seminar keçiriləcək

04 April 2019

Aprelin 5-də Azərbaycan Dövlət Mədəniyyət və İncəsənət Universiteti (ADMİU) Teatro.az sənət portalı və müstəqil dOM teatrının əməkdaşlığı ilə “Dünya teatr məkanında yeni təzahürlər: Sayt-spesifik teatr” mövzusunda seminar keçiriləcək.

Seminarın spikeri dOM Teatrının bədii rəhbəri Tərlan Rəsulovdur. O, dünya teatr məkanında geniş yayılmış “sayt-spesifik” teatr haqqında geniş məruzə ilə çıxış edəcək. Seminar çərçivəsində “Sayt-spesifik teatr” anlayışı ilə ümumi tanışlıq, onun dünya teatr məkanındakı yeri, Azərbaycan teatr gerçəkliyində tətbiqi və inkişaf perspektivləri müzakirə olunacaq. Müzakirələr spikerlə resipiyentlər arasında dialoq, sual-cavab şəklində gerçəkləşəcək. ADMİU-nun böyük səhnəsində reallaşacaq seminarda predmetə dair videomateriallar nümayiş olunacaq və sayt-spesifik teatrın konkret təzahürləri haqqında məlumat veriləcək.

“Site-spesifik” termini 1980-ci illərin əvvəllərindən yaransa da, 2000-ci illərdən sonra daha tez-tez işlənib. Rejissorlar tamaşa qoymaq üçün alternativ məkanlar, qeyri-teatral yerlər axtarırdılar. Teatrın qara qutuya bənzəyən səhnəsindən fərqli olaraq bu məkanların öz əhval-ruhiyyəsi, öz yaddaşı var. Onların yaddaşında müxtəlif əhvalatlar-tarixçələr var, rejissorlar tamaşa ilə bu əhvalatları canlandırmağa çalışırlar.

Sayt-spesifik bir sıra interaktiv teatr növlərini özündə ehtiva edir. Bunlara küçə teatrından savayı, İmmersiv Teatr (Immersive Theatre), Gəzinti Teatrı (Promenade Theatre), Mühit Teatrı (Environmental Theatre), Muzey Teatrı daxildir.



© 2018 Azərbaycan Televiziya və Radio Verilişləri Qapalı Səhmdar Cəmiyyəti