Bakıda gənc ifaçıların “World harmony” beynəlxalq müsabiqəsinə başlanılıb

04 April 2019

Bakıda gənc ifaçıların “World harmony” beynəlxalq klassik və folklor musiqi müsabiqəsinə start verilib.

Müsabiqə MDB iştirakçısı olan ölkələrin Dövlətlərarası Humanitar Əməkdaşlıq Fondu, Azərbaycanın Mədəniyyət Nazirliyi, Bakı Şəhər Mədəniyyət Baş İdarəsi və Qara Qarayev adına Mərkəzi İncəsənət Məktəbinin birgə maliyyə və təşkilati dəstəyi ilə reallaşır.

Baş İdarədən bildirilib ki, müsabiqə instrumental solo (fortepiano, simli alətlər, nəfəs və zərb alətləri, xalq çalğı alətləri), vokal (akademik, milli, estrada), rəqs və instrumental ansambllar (klassik və milli), vokal ansambllar (akademik, milli və estrada), xor və rəqs kollektivləri nominasiyaları üzrə təşkil edilib. Yarışmaya müxtəlif yaş qrupları üzrə respublikamızın və dünyanın müxtəlif ölkələrindən 346 nəfər solo ifaçı (Almaniya – 1, Belarus – 5, Gürcüstan – 5, Qazaxıstan – 47, Özbəkistan – 4, Rusiya – 20, Ukrayna – 4, Macarıstan – 2, Litva – 2, Azərbaycan – 256 nəfər) və 6 xor, 2 rəqs kollektivi, 19 qarışıq tərkibli ansambl qatılıb. Təşkilat komitəsi tərəfindən Qran Pri mükafatçılarına 300 (üç yüz), 1-ci dərəcəli diplom alan iştirakçılara isə 200 (iki yüz) manat məbləğində mükafat ayrılıb.

Müsabiqənin münsiflər heyəti ölkəmizlə yanaşı, Belarus, Fransa, Gürcüstan, İsrail, Qazaxıstan, Litva, Macarıstan, Monako, Rusiya və Özbəkistan kimi ölkələrdən dəvət olunmuş görkəmli mütəxəssislərdən ibarətdir. Müsabiqə ərəfəsində dünya şöhrətli peşəkar musiqiçilər tərəfindən fortepiano, vokal, simli, nəfəs alətləri ixtisasları üzrə ustad dərsləri təşkil olunub.

Aprelin 4-də M.Maqomayev adına Azərbaycan Dövlət Akademik Filarmoniyasında Sankt-Peterburq musiqi liseyinin ümumrusiya və beynəlxalq müsabiqə laureatları olan müəllim və şagirdlərinin iştirakı ilə konsert və aprelin 7-də müsabiqə qaliblərinin möhtəşəm qala-konserti, mükafatlandırma mərasimi keçiriləcək. Seçilmiş iştirakçılara hədiyyələr və pul mükafatları təqdim olunacaq.



© 2018 Azərbaycan Televiziya və Radio Verilişləri Qapalı Səhmdar Cəmiyyəti