Seyid Şuşinskinin anadan olmasının 130 illiyi qeyd edilib

04 April 2019

Aprelin 3-də Musiqi Mədəniyyəti Dövlət Muzeyində Azərbaycan xanəndəlik məktəbinin bənzərsiz simalarından biri, Xalq artisti Seyid Şuşinskinin anadan olmasının 130 illiyinə həsr edilmiş tədbir keçirilib.

Xəbər verilir ki, tədbirdə çıxış edən muzeyin direktoru, Əməkdar mədəniyyət işçisi, sənətşünaslıq üzrə fəlsəfə doktoru Alla Bayramova sənətkarın ömür yolundan və muğam sənətinin inkişafı naminə gördüyü işlərdən söz açıb.

Bildirilib ki, görkəmli muğam ifaçısının 130 illik yubileyi ölkə başçısının müvafiq Sərəncamı ilə silsilə tədbirlərlə qeyd olunacaq.

Muzeyin Xalq Çalğı Alətləri şöbəsinin müdiri Təranə Zeynalova Seyid Şuşinskinin yaradıcılıq yolu, Azərbaycan milli musiqi mədəniyyətinin inkişafında xidmətləri haqqında geniş məlumat verib. Onun çıxışı muzeyin arxiv materialları əsasında hazırlanmış slaydşou ilə müşayiət olunub.

Tədbirdə Xalq artistləri Canəli Əkbərov, Vamiq Məmmədəliyev, Ramiz Quliyev, Azərbaycan Milli Konservatoriyasının baş müəllimi Qəzənfər Abbasov, Əməkdar artist Süleyman Abdullayev, Azərbaycan Milli Konservatoriyası nəzdində Musiqi Kollecinin direktoru, Əməkdar incəsənət xadimi Nazim Kazımov, Əməkdar incəsənət xadimi, professor Arif Əsədullayev və başqaları Seyid Şuşinskinin bənzərsiz sənət dünyasından söz açıb, onunla bağlı xatirələrini bölüşüblər.

Bildirilib ki, Qarabağ xanəndəlik məktəbinə mənsub qüdrətli sənətkar Seyid Şuşinski xalqımızın mənəvi dünyasının formalaşmasında müstəsna əhəmiyyət daşıyan qədim muğam ənənələrimizi layiqincə qoruyub yaşadıb. Geniş diapazonlu nadir, ecazkar səsə və yüksək səhnə mədəniyyətinə malik böyük muğam ustası təkrarolunmaz mükəmməl ifaçılıq nümunələri ilə Azərbaycanın musiqi xəzinəsini daha da zənginləşdirib. Seyid Şuşinski müəllim kimi uzun illər ərzində istedadlı musiqiçilərin yetişdirilməsi sahəsində də təqdirəlayiq fəaliyyət göstərib.

Seyid Şuşinski ifa üçün mürəkkəb muğam olan “Cahangah”ı xüsusilə böyük məharətlə oxuyub, özü də həmişə onu “mayə”dən deyil, “Mənsuriyyə”dən başlayıb. Məhz bu ustalıqlarına görə Azərbaycan muğam tarixinin əfsanələrindən olan Cabbar Qaryağdıoğlu onu “Şərq musiqisinin incisi” adlandırıb.

Onun oxuduğu “Çahargah”, “Hümayun”, “Rast”, “Mahur”, “Zabul”, “Şahnaz”, “Mirzə Hüseyn seygahı”, muğamları, “Mani”, “Arazbarı”, “Mənsuriyyə” zərbi muğamları musiqi xəzinəmizdə bənzərsiz sənət əsərləri kimi özünəməxsus yer tutmaqdadır. O, bir çox muğamlara yeni guşələr əlavə edib, bir çox muğamları isə birləşdirib oxuyub.

Tədbir Azərbaycan Musiqi Mədəniyyəti Dövlət Muzeyinin Qədim Musiqi Alətləri Ansamblının solist, Xalq artisti Teyyub Aslanovun və Azərbaycan Mədəniyyət və İncəsənət Universitetinin tələbəsi Məftun Səfərlinin ifasında konsert proqramı təqdim olunub.



© 2018 Azərbaycan Televiziya və Radio Verilişləri Qapalı Səhmdar Cəmiyyəti