Kiyevdə Nəsiminin heykəli ucaldılacaq

01 March 2019

Kiyev şəhərinin mərkəzi parklarının birində xalqımızın çoxəsrlik ənənələrə malik bədii və fəlsəfi fikrində dərin iz qoymuş mütəfəkkir şair İmadəddin Nəsiminin heykəlinin ucaldılması üçün hazırlıq işləri tamamlanmaq üzrədir.

Bu yaxınlarda Azərbaycanın Ukraynadakı səfiri Azər Xudiyev heykəlin müəllifi, Ukraynanın Xalq rəssamı, tanınmış heykəltəraş Seyfəddin Qurbanovun emalatxanasında olub. S.Qurbanov məlumat verib ki, tuncdan hazırlanan heykəlin hündürlüyünün 5 metrə yaxın olacağı nəzərdə tutulur. Yaz aylarında iş təhvil veriləcək.

Xatırladaq ki, Nəsiminin heykəlinin ucaldılması ilə bağlı səfirliyimizlə Kiyev şəhər Dövlət Administrasiyası arasında ilkin razılıq əldə edilib.

Qeyd edək ki, Prezident İlham Əliyevin Sərəncamı ilə 2019-cu il ölkəmizdə “Nəsimi ili” elan edilib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti