Bakıda Leopold Rostropoviçin doğum günü qeyd olunub

01 March 2019

Fevralın 28-də L. və M.Rostropoviçlərin ev-muzeyində dünyaşöhrətli violonçel ustasının anadan olmasının 127-ci ildönümü qeyd edilib.

Muzeyin direktoru, Əməkdar mədəniyyət işçisi Şeyla Heydərova tədbiri açaraq, hər il tanınmış musiqiçinin doğum gününün Bakıda qeyd edildiyini bildirib. Ş.Heydərova Leopold Rostropoviçin həyat və yaradıcılığından, onun dünya mədəniyyətinin inkişafına verdiyi misilsiz töhfələrdən danışıb. O, həmçinin qeyd edib ki, Bakıda yaşayan L.Rostropoviç tez-tez xeyriyyə konsertləri təşkil edib, aktiv pedaqoji fəaliyyətlə məşğul olub. Violonçel ustasının yaradıcılıq fəaliyyəti “Kaspi” və “Baku” qəzetlərində geniş işıqlandırılıb. L.Rostropoviç Bakını sevirdi və Bakı tamaşaçıları da maestronun konsertlərinə böyük maraqla gəlirdilər.

Tədbir konsert proqramı ilə davam edib. Bülbül adına musiqi məktəbinin şagirdlərinin ifasında Azərbaycanın və xarici ölkə bəstəkarlarının əsərləri səsləndirilib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti