İslam Əməkdaşlıq Təşkilatının Mədəniyyət Həftəsi Bakıda keçiriləcək

28 February 2019

Mədəniyyət naziri Əbülfəs Qarayev Birləşmiş Ərəb Əmirliklərinin (BƏƏ) Şarca Əmirliyinin Hökumət əlaqələri üzrə İdarəsinin sədri Şeyx Fahim bin Sultan Əl - Qasiminin rəhbərlik etdiyi nümayəndə heyəti ilə görüşüb.

Görüşdə Azərbaycan və BƏƏ arasında mədəniyyət sahəsində əlaqələr, bu sahədə Şarca Əmirliyi ilə qarşılıqlı təcrübə mübadiləsinin aparılması ilə bağlı fikir mübadiləsi aparılıb.

Nazir mayın 2-3-də Bakıda keçiriləcək 5-ci Ümumdünya Mədəniyyətlərarası Dialoq Forumu və iyunun 30-dan iyulun 10-dək UNESCO-nun Ümumdünya İrs Komitəsinin 43-cü sessiyasına hazırlıq işlərinin görüldüyünü diqqətə çatdırıb. Həmçinin yaradıcı sənayelər sahəsində həyata keçirilən və planlaşdırılan fəaliyyət istiqamətləri barədə məlumat verilib.

Şeyx Fahim bin Sultan Əl - Qasimi səfərin məqsədinin Azərbaycanla Şarca Əmirliyi arasında mədəniyyət sahəsində əlaqələrin dərinləşdirilməsi və bu sahədə təcrübə mübadiləsinin aparılması olduğunu bildirib. Şarca şəhərinin 2019-cu il üçün UNESCO-nun Dünya Kitab Paytaxtı elan olunduğunu qeyd edən Əl - Qasimi bununla əlaqədar bu şəhərdə təşkil olunacaq kitab sərgisi və irs günlərində ölkəmizi iştirak etməyə dəvət edib.

Əbülfəs Qarayev təklifi yüksək qiymətləndirdiyini və sözügedən tədbirlərdə iştirak məsələsinin nəzərdən keçiriləcəyini bildirib. Nazir, həmçinin cari ilin payız aylarında ölkəmizdə İslam Əməkdaşlıq Təşkilatının (İƏT) Mədəniyyət Həftəsinin keçiriləcəyini qeyd edərək qarşı tərəfi tədbirdə iştiraka dəvət edib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti