Konservatoriyada “Tar və piano üçün jazz-pop repertuarı” kitabının təqdimatı olub

28 February 2019

Fevralın 28-də Azərbaycan Milli Konservatoriyasında (AMK) tanınmış tar ifaçısı, Əməkdar artist Şəhriyar İmanovun “Tar və piano üçün jazz-pop repertuarı” adlı konserti keçirilib.

Xəbər verilir ki, İsveçrənin ölkəmizdəki səfirliyi və Konservatoriyanın birgə təşkilatçılığı ilə reallaşan konsertdə, tar və piano üçün musiqi notları kitabının da təqdimatı olub. İsveçrə İnkişaf və Əməkdaşlıq Agentliyinin (SDC) dəstəyi ilə çap edilən kitabda 20-ci əsrin çox məşhur pop və caz əsərləri tar və piano üçün transkripsiyada göstərilib.

Tədbirdə çıxış edən AMK-nın rektoru, Xalq artisti Siyavuş Kərimi, bir vaxtlar konservatoriyanın tələbəsi olmuş və hazırda həmin ali məktəbdə müəllim qismində çalışan Ş.İmanov haqqında fikirlərini bölüşüb.

Rektor, tarzənin gənc olmasına baxmayaraq, çətin işin öhdəsindən uğurla gəldiyini diqqətə çatdırıb.

S. Kərimi bildirib ki, tar musiqi alətinin və ümumilikdə Azərbaycan milli musiqisinin təbliğində Ş. İmanovun xidmətləri böyükdür və bu təqdirəlayiqdir.

Konsertdə Ş. İmanovu gənc pianoçu Tural Rafael və tarzən İsmayıl Zülfüqarov müşayiət edib.

Qeyd edək ki, təqdim olunan kitabın not düzəlişi bəstəkar Firudin Allahverdiyə aiddir.



© 2018 Azərbaycan Televiziya və Radio Verilişləri Qapalı Səhmdar Cəmiyyəti