Əməkdar artist Qoçaq Əsgərov Bəhreyndə konsert verəcək

27 February 2019

Martın 4-də tanınmış xanəndə, Əməkdar artist Qoçaq Əsgərov Bəhreyndə konsert proqramı ilə çıxış edəcək. Konsertdə ənənəvi olaraq caz ilə muğamın sintezi iştirakçılara təqdim olunacaq. Bu barədə məlumat verən xanəndə deyib ki, konsertdə milli mahnılarımızla yanaşı, muğamlarımıza da yer veriləcək.

“Bundan öncə Birləşmiş Ərəb Əmirliklərinin paytaxtı Əbu-Dabidə təqdim etdiyimiz konsert uğurlu oldu. Konsert çərçivəsində “Şur” muğamını ifa etməyim zalda böyük coşqu ilə qarşılandı. Konserti izləyənlər arasında ərəb şeyxi və səfirliyimizin nümayəndələri də var idi. Konsertdə çoxsaylı musiqi janrları üzrə vokalist Pyer de Tregomən ilə mən ənənəvi muğam və açıq improvizasiyalardan ibarət orijinal repertuar təqdim etdik. Ümid edirəm ki, fransız həmkarımla birlikdə budəfəki konsertimiz də möhtəşəm alınacaq. Konsertdə bizi İbrahim Babayev (tar), Elnur Mikayılov (kaman), Hüsaməddin Əzizov (nağara) və Vasif Hüseynzadə (pianino) müşayiət edəcək”, -deyə Qoçaq Əsgərov söyləyib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti