Heydər Əliyev Mərkəzində rus avanqard rəssamlarının nadir əsərlərindən ibarət sərgi açılıb

18 February 2019

Heydər Əliyev Mərkəzində “Zamanında. Rusiya regional muzeylərinin 1900-1930-cu illərə aid rus avanqardı kolleksiyaları. Üçüncü hissə” adlı sərginin açılışı olub. Heydər Əliyev Fondunun vitse-prezidenti Leyla Əliyeva tədbirdə iştirak edib.

“Ölkəmizin mədəni həyatında bir çox tədbirlər keçirilir. Heydər Əliyev Mərkəzi artıq ənənəvi olaraq bu cür tədbirlərin keçirildiyi məkana çevrilib və burada keçirilən tədbirlər yüksək qiymətləndirilir.” Bu sözləri “Zamanında. Rusiya regional muzeylərinin 1900-1930-cu illərə aid rus avanqardı kolleksiyaları. Üçüncü hissə” adlı sərginin açılışında Heydər Əliyev Mərkəzinin direktoru Anar Ələkbərov dedi. Bu layihənin üzərində uzun zamandır işlənildiyini vurğulayan Anar Ələkbərov sərginin ərsəyə gəlməsindən məmnunluğunu bildirdi və onun ölkəmizdə ilk dəfə keçirildiyini diqqqətə çatdırdı. Sərgi barədə fikirlərini bölüşən Heydər Əliyev Mərkəzinin direktoru layihənin reallaşmasına göstərdikləri dəstəyə görə Azərbaycanın birinci-vitse prezidenti, Heydər Əliyev Fondunun prezidenti Mehriban Əliyevaya və Fondun vitse-prezidenti Leyla Əliyevaya minnətdarlığını bildirdi. Heydər Əliyev Mərkəzinin direktoru Rusiya Yəhudi İcmaları Federasiyasının prezidenti, Yəhudi Muzeyi və Tolerantlıq Mərkəzinin baş direktoru Aleksandr Boroda və Sərginin kuratoru, incəsənət tarixçisi Andrey Sarabyanovun da bu layihənin reallaşmasındakı xidmətlərinə toxundu.

Rusiya Yəhudi İcmaları Federasiyasının prezidenti, Yəhudi Muzeyi və Tolerantlıq Mərkəzinin baş direktoru Aleksandr Boroda bildirdi ki, Rusiyanın regional muzeylərindən toplanan bu əsərlərin sərgisi Heydər Əliyev Mərkəzi, Rusiyanın Yəhudi Muzeyi və Tolerantlıq Mərkəzi, Moskva Müasir İncəsənət Muzeyinin birgə səyləri sayəsində mümkün olub. Aleksandr Boroda rəhbərlik etdiyi mərkəzin uzun illərdir ki, Heydər Əliyev Mərkəzi ilə səmərəli əməkdaşlıq qurduğunu vurğuladı.

“Biz Heydər Əliyev Fondun rəhbərliyinin qarşılıqlı hörmət və tolerantlıq prinsiplərini tam dəstəkləyirik”- deyən Aleksandr Boroda, Azərbaycan prezidentinin rəhbərliyi ilə həyata keçirilən tolerantlıq siyasətinə böyük hörmətlə yanaşdıqlarını vurğuladı. O, gələcəkdə də bu cür layihələrin olacağına əminliyini ifadə etdi.

“Çox sevinirəm ki, bu gün rus avanqardı Bakıya gəlib”. Bu sözləri isə Sərginin kuratoru, incəsənət tarixçisi Andrey Sarabyanov dedi. Bildirdi ki, sərginin Bakıda keçirilməsi təsadüfi deyil. Andrey Sarabyanov sərgi haqqında fikirlərini bölüşdü. Vurğuladı ki, sərginin unikallığı ondadır ki, burada az tanınan rəssamların da əsərləri sərgilənir. Çıxışının sonunda o, sərginin təşkilatçılarına bir daha minnətdarlığını bildirdi.

Sonra sərginin açılışı oldu.

Ekspozisiyada Rusiyanın 17 şəhərində regional muzeylərdən toplanmış unikal avanqard kolleksiya nümayiş olunur. Burada tanınmış avanqard klassiklər - Kazimir Maleviç, Vasili Kandinski, Aleksandr Rodçenko, Vladimir Tatlin, Aleksandr Ekster, Mark Şaqal ilə yanaşı, Viktor Bart, Aleksey Qrişenko, Aleksey Morqunov, Sergey Romanoviç, Pavel Mansurov və digərləri kimi avanqard incəsənət tarixinə mühüm töhfələr vermiş sənətkarların yaradıcılığından nümunələr təqdim olunub. Ümumilikdə 60 əsərin yer aldığı ekspozisiya özündə 2016 və 2017-ci illərdə Moskvada nümayiş olunmuş “Zamanında. Birinci hissə” və “Zamanında. İkinci hissə” sərgilərinin eksponatlarını birləşdirir və rus avanqardının 1900-cü illərin ortalarında formalaşmasından başlayaraq 1930-cu illərin əvvəllərindəki tənəzzülünə qədər olan dövrü əhatə edir. Layihənin əsas ideyası məşhur, az tanınmış və ümumiyyətlə tanınmamış avanqard rəssamların Rusiya regional muzeylərinin kolleksiyalarında qorunan əsərlərini təqdim etmək, XX əsrin ilk 30 ilində rus incəsənətindəki əsas üslubları nümayiş etdirməkdir. İncəsənət tarixçisi, rus avanqardı barədə silsilə monoqrafiya və nəşrlərin müəllifi Andrey Sarabyanovun kuratoru olduğu sərgi mayın 5-dək davam edəcək.



© 2018 Azərbaycan Televiziya və Radio Verilişləri Qapalı Səhmdar Cəmiyyəti