Moskvada tanınmış rejissorlar Tofiq Şahverdiyev və Rimas Tuminasın yaradıcılıq gecəsi keçirilib

11 February 2019

Moskvadakı Mərkəzi Kino Evində Azərbaycanın Xalq artisti, Rusiyanın Əməkdar incəsənət xadimi, kinorejissor Tofiq Şahverdiyev və Yevgeni Vaxtanqov adına Rusiya Dövlət Akademik Teatrın bədii rəhbəri Rimas Tuminasın yaradıcılıq gecəsi keçirilib.

Azərbaycanın və Litvanın Rusiyadakı səfirliklərinin dəstəyi ilə təşkil olunmuş tədbir çərçivəsində rejissor Tofiq Şahverdiyevin Rimas Tuminasa həsr edilmiş “Bizim bütün həyatımız oyundur” adlı sənədli filminin premyerası oldu. Gecədə çıxış edən Litvanın Moskvadakı səfiri Remiqiyus Motuzas və Azərbaycanın Rusiyadakı səfirliyinin nümayəndəsi Nigar Axundova qeyd etdilər ki, iki xalqın tanınmış mədəniyyət xadimlərinin yaradıcılıq gecəsinin keçirilməsi əlamətdar hadisədir. Tofiq Şahverdiyev isə dram teatrının rejissoru Rimas Tuminasın “Qaratoxmaq qadın” operasını səhnələşdirməsini qeyri-adi hadisə adlandırdı. O, həmçinin bu yaxınlarda Azərbaycan Prezidenti İlham Əliyevin Sərəncamı ilə ona “Azərbaycan Respublikasının Xalq artisti” fəxri adının verilməsindən qürur duyduğunu da vurğuladı, yaradıcılığına verilən yüksək dəyərə görə minnətdarlığını bildirdi. 

Qeyd edək ki, gecədə Azərbaycan və Litvanın Moskvadakı səfirliklərinin, Heydər Əliyev Fondunun Rusiya nümayəndəliyinin, iki ölkənin Rusiyadakı diasporlarının nümayəndələri, Rusiyanın mədəniyyət xadimləri iştirak edirdi.



© 2018 Azərbaycan Televiziya və Radio Verilişləri Qapalı Səhmdar Cəmiyyəti