69-cu Berlin Beynəlxalq film festivalı başlayıb

08 February 2019

Almaniyada “Berlinale” kimi tanınan və dünyanın ən nüfuzlu festivallarından olan 69-cu Berlin Beynəlxalq Film Festivalı başlayıb. Festival çərçivəsində 400-ə yaxın film nümayiş olunacaq. “Qızıl ayı” və “Gümüş ayı” mükafatlarını almaq uğrunda 17 film mübarizə aparacaq.

69-cu Berlin Beynəlxalq Film Festivalı danimarkalı rejissor Lone Şerfiqin “Yadların xeyirxahlığı” filmi ilə açılıb. Filmdə şəxsi həyatlarında çətinliklərlə üzləşən insanlardan bəhs olunur. Ekran əsərində baş rollardan birini - Klaranı Zoe Kazan ifa edib. O, həyat yoldaşının zorakılığından qurtulmaq üçün uşaqları ilə birlikdə evini tərk edərək Nyu-Yorka gələn qadın obrazını canlandırır. Burada Klara tanımadığı insanlarla – tibb bacısı, aşpaz, vəkillə bir araya gəlir. Filmdə ədalətsizlik və bərabərsizlik mövzularına qiddət çəkilir. Fevralın 17-dək davam edəcək festivalın münsiflər heyətinin prezidenti, fransalı aktrisa Jülyett Binoşdur. Münsiflər heyətinin tərkibinə kinotənqidçi Castin Çan, almaniyalı aktrisa Sandra Hüller, Nyu-York Müasir İncəsənət Muzeyinin kino bölməsinin baş kuratoru Racendra Roy da daxildir. 1951-ci ildən etibarən hər il təşkil olunan festival çərçivəsində 400-ə yaxın film nümayiş olunacaq. “Qızıl ayı” və “Gümüş ayı” mükafatlarını almaq uğrunda 17 film mübarizə aparacaq.



© 2018 Azərbaycan Televiziya və Radio Verilişləri Qapalı Səhmdar Cəmiyyəti