Bakı Yeni ili qarşılamağa hazırlaşır

25 December 2018

Bakı Yeni ili özünəməxsus qarşılayacaq. Bunun üçün paytaxt xüsusi dizaynla bəzədilib. Artıq hazırlıq işləri tamamlanmaq üzrədir.

2019-cu ilin gəlişinə çox az qalıb. Paytaxtın Yeni il hazırlıqları bitmək üzrədir. Ən böyük şam ağacı Azadlıq meydanında qurulub. Hündürlüyü 37 metrdir. Qız qalasının yaxınlığında qeyri-adi görünüşlü, dekorativ şam ağacı quraşdırılıb. Şəhərin park və xiyabanları, yollar, küçələr də bəzədilib. Paytaxtın bu gözəlliyini sakinlərlə yanaşı, şəhərimizin qonaqları da böyük həvəslə izləyirlər.

Şəhərdə ən böyük əyləncə məkanlarından biri Fəvvarələr meydanındadır. Bayram ərəfəsində Fəvvarələr meydanında ənənəvi “Soyuq əllər, isti ürək” xeyriyyə yarmarkası keçirilir. Ərazidə qurulan pavilyonlar əylənmək və hədiyyə almaq üçün əla fürsət yaradır. Bayramın gəlişinə ən çox sevinən isə uşaqlardır.

Dənizkənarı Bulvar İdarəsi də artıq bayram hazırlıqlarını yekunlaşdırıb. Kukla Teatrının arxasında yerləşən meydanda sakinlərə bayram proqramı təqdim olunacaq. Milli Parka gələn paytaxt sakinləri və şəhərimizin qonaqlarını maraqlı sürprizlər, canlı musiqi gözləyir.



© 2018 Azərbaycan Televiziya və Radio Verilişləri Qapalı Səhmdar Cəmiyyəti