“Yada düşdü” ədəbi-bədii jurnalının növbəti nömrəsi yazıçı-dramaturq Nahid Hacızadəyə həsr edilib

30 May 2018

Mayın 29-da Azərbaycan Yazıçılar Birliyinin (AYB) “Natəvan” klubunda “Yada düşdü” ədəbi-bədii, nostalji jurnalının yazıçı-dramaturq Nahid Hacızadənin xatirəsinə həsr edilmiş xüsusi nömrəsinin təqdimatı keçirilib.

Tədbirdə jurnalın baş redaktoru Nəzakət Məmmədli “Yada düşdü”nün yaranmasından, Nahid Hacızadənin gərgin əməyindən, gənc qələm sahiblərinə, eləcə də ona böyük qayğısından söhbət açıb, ədibin müsbət keyfiyyətlərindən danışıb.

Tədbirdə yazıçı-publisist Elçin Hüseynbəyli, “Qobustan” jurnalının baş redaktoru Vaqif Əlixanlı, vaxtilə N.Hacızadə ilə birgə çalışmış Əlövsət Bəşirli, “Mədəniyyət” jurnalının baş redaktoru Zöhrə Əliyeva, şairlər Oqtay Rza, Fərqanə Mehdiyeva və başqaları Nahid Hacızadəni zəngin yaradıcılığından söz açıblar. Çıxış edənlər onun yazıçı-dramaturq olmaqla yanaşı, ömrünün ən gözəl illərini, yaradıcı həyatının bütöv bir hissəsini Azərbaycan radiosuna və televiziyasına həsr edərək, özünəməxsus telejurnalistika məktəbi yaratdığını bildiriblər. O, otuz il “Gənclik”, “Ədəbi-dram” redaksiyalarına rəhbərlik edib, sonra sədr müavini olub, daha sonra müxtəlif vəzifələrdə çalışıb.

Bildirilib ki, “Məhəbbət ölüncə var”, “Dağlar, sizdə gözüm qaldı”, “Payız leysanları”, “Bir ana tanıyırdım”, “Köçündən ayrılan durna”, “Ömür gözləyir bizi” və digər əsərlərində, çoxsaylı veriliş, telefilm və teletamaşalarında onun qeyri-adi, işıqlı daxili aləmi təcəssüm tapıb. Beləcə yaddaşlarda da işıqlı, nurlu çöhrəli bir insan kimi əbədiləşib.

Sonda ədibin qızı Samirə Hacızadə atasının xatirəsinə göstərilən diqqətə və hörmətə görə tədbirin təşkilatçılarına və iştirakçılarına minnətdarlığını bildirib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti