Bakıda görkəmli bəstəkar Qara Qarayevin xatirəsi anılıb

14 May 2018

1982-ci il mayın 13-ü ölkəmizin musiqi mədəniyyəti tarixində kədərli gündür. Həmin gün Azərbaycan xalqının böyük oğlu, görkəmli bəstəkar, pedaqoq, ictimai xadim, SSRİ Xalq Artisti, Sosialist Əməyi Qəhrəmanı, dövlət mükafatları laureatı, akademik Qara Qarayev vəfat edib.

Mayın 13-də Azərbaycan Bəstəkarlar İttifaqının kollektivi, ölkəmizin musiqi ictimaiyyətinin nümayəndələri dünya şöhrətli bəstəkarın xatirəsini anmaq üçün Fəxri xiyabana gəliblər.

Azərbaycan Bəstəkarlar İttifaqının sədri, Xalq Artisti, professor Firəngiz Əlizadə Qara Qarayevin həyat və yaradıcılığından danışıb. Qeyd edib ki, Azərbaycan xalqı qarşısında onun xidmətləri əvəzsizdir. Bu pərəstişə layiq şəxsiyyətin qoyub getdiyi çoxsaylı əsərlər bu gün dünya səhnələrində səsləndirilir. "Qara Qarayevi bütün dünyada tanıyır və sevirdilər. Çox zəhmətsevər, qayğıkeş, təvazökar insan olan Qara Qarayev neçə-neçə istedadlı musiqiçi nəsli yetişdirib. Onun vəfatı xalqımız üçün böyük itki olub", - deyə Firəngiz Əlizadə bildirib.

Azərbaycan Bəstəkarlar İttifaqının sədri diqqətə çatdırıb ki, 2018-ci ildə görkəmli bəstəkarın anadan olmasının 100 illiyinin qeyd edilməsi ilə əlaqədar ölkə başçısının imzaladığı müvafiq Sərəncama əsasən ilboyu Qara Qarayevə həsr edilən tədbirlər keçiriləcək.

Sonra Qara Qarayevin tələbələri – Əməkdar İncəsənət xadimləri - professor Elnarə Dadaşova, musiqişünas Nərgiz Şəfiyeva və bəstəkar, Azərbaycan Bəstəkarlar İttifaqının katibi Cəlal Abbasov xatirələrini bölüşüblər.

Qeyd olunub ki, Qara Qarayev Azərbaycan peşəkar musiqi sənətinin inkişafına böyük töhfə verən dahi bəstəkardır. Məhz onun pedaqoqluq məharəti sayəsində tələbələri yüksək zirvələrə çatıblar.

Tədbir iştirakçıları, həmçinin Azərbaycanın görkəmli bəstəkarları Üzeyir Hacıbəyli, Tofiq Quliyev, Fikrət Əmirov, Vasif Adıgözəlov, habelə baba Müslüm Maqomayev və nəvə Müslüm Maqomayevin xatirələrini anıb, məzarları önünə güllər düzüblər.



© 2018 Azərbaycan Televiziya və Radio Verilişləri Qapalı Səhmdar Cəmiyyəti