Görkəmli opera ifaçısı, aktyor Firudin Mehdiyevin 90 illik yubileyinə həsr olunmuş xatirə gecəsi keçirilib

08 May 2018

7 may 2018 – ci il tarixində Müslüm Maqomayev adına Azərbaycan Dövlət Akademik Filarmoniyasında Azərbaycan Televiziyasının “Mədəniyyət” kanalının təşkilatçılığı, Mədəniyyət Nazirliyinin dəstəyi ilə görkəmli opera ifaçısı, aktyor Firudin Mehdiyevin 90 illik yubileyinə həsr olunmuş xatirə gecəsi keçirilib.

Konsertdə Azərbaycan Televiziyası və Radiosunun Niyazi adına Simfonik Orkestrinin müşayiətilə dirijor, beynəlxalq müsabiqələr laureatı Cavad Tağızadənin təfsirində Azərbaycan vokal məktəbinin tanınmış simaları  çıxış edib.

Konsertin əvvəlində “Mədəniyyət” kanalının direktoru Ramil Qasımov çıxış edərək Firudin Mehdiyevin yaradıcılıq yolunu işıqlandıraraq, onun Azərbaycan vokal sənətinə verdiyi töhfələrdən söz açıb. O vurğulayıb ki, Firudin Mehdiyev Azərbaycan professional vokal məktəbinin banisi, dahi Bülbülün yetirməsi olub. O istər opera ifaçısı kimi, istərsə də aktyor kimi Azərbaycan mədəniyyətinə öz töhfəsini verib. Eyni zamanda Firudin Mehdiyev Azərbaycan operalarının libretto müəllifi kimi də tarixdə öz silinməz izlərini qoyub.  Onun həmçinin zəngin repertuar politrası var idi.  Eləcə də Firudn Mehdiyev Azərbaycan bəstəkarlarının romanslarının ilk ifaçılarından olub. Görkəmli ifaçı uzun illər Bakı Musiqi Akademiyasında müəllim kimi fəaliyyət gösrəmiş, mədəniyyətimizə gözəl ifaçılar təqdim etmişdir.



© 2018 Azərbaycan Televiziya və Radio Verilişləri Qapalı Səhmdar Cəmiyyəti