Bakıda dördüncü Britaniya Film Festivalı başlayıb

02 May 2018

Bu gündən etibarən Bakıda “British Council Azerbaijan”, Böyük Britaniyanın Azərbaycandakı səfirliyi və Nizami Kino Mərkəzinin birgə təşkilatçılığı ilə Britaniya kinematoqrafiyasının uğur qazanmış ən yaxşı yeni filmləri təqdim olunacaq. Kinosevərlər filmlər artıq Bakıda dördüncü Britaniya Film Baharı Festivalını çərçivəsində izləyə biləcəklər.

Bu sözləri “British Council Azerbaijan”nın rəhbəri Elizabet Vayt jurnalistlərə müsahibəsində deyib.

O bildirib ki, festival rəhbəri olduğu qurumun ölkəmizdəki fəaliyyətinin 25-ci ildönümünə həsr edilir. Festival çərçivəsində bir-birindən maraqlı və fərqli 8 film - "Nəfəs al" (Breathe), "Dafna" (Daphne), "Korluq haqqında qeydlər" (Notes of Blindness), "Devid Boui" (David Bowie Is), "Tutqun işıqlar şəhəri" (City of Tiny Lights), "İngiltərə mənimdir" (England is Mine), "Baxıcı" (The Carer) və "Əyri ev" (Crooked House) nümayiş ediləcək.

“Endi Serkisin rejissoru olduğu və mükafata layiq görülmüş “Nəfəs al” builki festivalın açılış filmi olacaq. Bütün filmlər ingilis dilində təqdim ediləcək. Filmsevərlər “Nəfəs al”, “Dafna” və “İngiltərə mənimdir” filmlərini Azərbaycan dilində alt yazılarla izləyə biləcəklər. Ümid edirəm ki, Bakı tamaşaçıları bu möhtəşəm filmləri izləmək fürsətini qaçırmayacaq. Biz Britaniya filmlərini və film rejissorlarını Azərbaycan tamaşaçılarına təqdim etmək, innovasiyalar, fərqlilik və mükəmməllik yaratmaq və yaradıcılıq mübadiləsi üçün imkanlar axtarmaq istəyirik”, - deyə E.Vayt söyləyib.

Festivalla bağlı fikirlərini jurnalistlərlə bölüşən Böyük Britaniyanın Azərbaycandakı səfiri xanım Karol Krofts deyib: “Birləşmiş Krallığın film sənayesi 2017-ci ildə tamaşaçıların həyəcanla izlədiyi dramlar, blokbasterlər və komediyalarla yadda qaldı. Britaniya Film İnstitutunun dərc etdiyi statistik məlumatlar Britaniya filminin 2017-ci ildə indiyə qədər görünməmiş böyük müvəffəqiyyətə nail olduğunu və kinematoqrafiya sahəsində lider mövqeyini bir daha möhkəmləndirdiyini göstərir. Bu il Britaniya filminin tamaşaçı auditoriyasının artması ilə də əlamətdardır”.

Sonra “Nəfəs al” filmi kinosevərlərin ixtiyarına verilib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti