Gənc Tamaşaçılar Teatrı beynəlxalq festivallarda iştirak edəcək

26 February 2018

Azərbaycan Dövlət Gənc Tamaşaçılar Teatrı fevralın 27-dən martın 2-dək Birləşmiş Ərəb Əmirliklərinin Əl Füceyra şəhərində keçirilən VIII Beynəlxalq Monodram tamaşalar festivalında iştirak edəcək.

Festival çərçivəsində teatrın kollektivi T.Vəliyevanın “Cəza” (təkadamlıq oyun) əsəri əsasında hazırlanmış eyniadlı tamaşa ilə çıxış edəcək.

Teatrın kollektivi, həmçinin martın 3-dən 8-dək VIII Beynəlxalq Dünya Teatr Olimpiadası təşkilatçılarının dəvəti ilə Hindistanın Dehli və Kəlkütə şəhərlərində də qastrol səfərində olacaq. Kollektiv səfərdə “Cəza” tamaşası ilə çıxış edəcək.

Qeyd edək ki, bu il 90 illiyini qeyd etməyə hazırlaşan teatr son illər Azərbaycan teatr sənətini xaricdə ən çox təbliğ edən kollektivlər sırasındadır. Nəzərdə tutulan dünya turu da məhz Azərbaycan teatrının dünyada tanıdılması siyasətinə xidmət edir. Ötən il teatr dünyanın 14 ölkəsində keçirilmiş beynəlxalq teatr festivallarında və qarşılıqlı qastrol mübadiləsi yolu ilə müxtəlif tamaşalarla ölkəmizi uğurla təmsil edib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti