Pakistandakı səfirliyimiz İslamabadda xeyriyyə bazarında təmsil olunub

05 December 2017

Azərbaycanın Pakistandakı səfirliyi bu ölkənin Xarici İşlər Nazirliyi nəzdində fəaliyyət göstərən Qadınlar Assosiasiyasının (QA) İslamabad şəhərində təşkil etdiyi xeyriyyə bazarında təmsil olunub.

Pakistandakı xarici səfirliklərin, habelə yerli şirkətlərin iştirakı ilə keçirilən tədbirdə hər ölkə öz mədəni dəyərlərini, adət-ənənələrini, iqtisadiyyatını, turizm potensialını nümayiş etdirib.

Pakistanın birinci xanımı Mahmudə Məmnun Hüseyn çıxışında Assosiasiyanın xeyriyyə tədbirini qeyri-rəsmi diplomatiyanın, həmçinin xalqlar və mədəniyyətlər arasında vəhdət və həmrəyliyin dəstəklənməsi kimi qiymətləndirib.

QA-nın prezidenti xanım Ayişə Haq təşkilatın imkansızlara, əlillərə, müxtəlif fəlakətlərdən ziyan çəkən adamlara əl tutduğunu bildirib, fəal iştiraka görə səfirliklərə və şirkətlərə təşəkkür edib.

Səfirliyimiz üçün ayrılan pavilyonda Azərbaycan-Pakistan əlaqələri, Ermənistanın Azərbaycana təcavüzü, ölkəmizin sosial-iqtisadi inkişafı, turizm potensialı, görkəmli şəxsiyyətləri haqqında kitablar, milli geyimlər, suvenirlər nümayiş olunub, iştirakçılar şəkərbura, paxlava, qoğal və sair şirniyyatlarımıza qonaq edilib.

Sərgidə böyük Azərbaycan şairi Nizaminin məqbərəsi, İçərişəhər, Mömünə Xatın türbəsi, Qız qalası, Şəki Xan sarayı, eləcə də milli musiqi alətləri və digər mədəniyyət nümunələrimizi əks etdirən maketlər, fotoşəkillər göstərilib.

Xeyriyyə bazarında iştirak edənlər Azərbaycan pavilyonuna böyük maraq göstərib və milli musiqimizi alqışlarla qarşılayıblar.

Tədbirdə yığılan vəsait imkansız insanlara verilməsi üçün QA-nın fonduna keçirilib.



© 2017 Azərbaycan Televiziya və Radio Verilişləri Qapalı Səhmdar Cəmiyyəti