Azərbaycan Xorvatiyada beynəlxalq festivalında təmsil olunub

07 June 2019

Xorvatiyanın Korçula şəhərində 4-cü “İpək Yolu - Dialoqa aparan yol” adlı Beynəlxalq Marko Polo Festivalı keçirilib.

Azərbaycanın Xorvatiyadakı səfirliyi də tədbirdə iştirak edib.

Bu il keçirilən tədbirdə Türkiyə, Koreya Respublikası, Hindistan, İran, İndoneziya, Qazaxıstan və digər ölkələrin nümayəndələri qatılıblar.

Tədbirin açılışında Azərbaycanın Xorvatiyadakı səfiri Fəxrəddin Qurbanov “Sülh bağı” adlı yeni salınmış parkda Xorvatiyada digər ölkələri təmsil edən səfirlər ilə birlikdə qədim zamanlardan sülhün rəmzi sayılan zeytun ağacının əkilməsi mərasimində iştirak edib.

4-cü “İpək yolu - Dialoqa aparan yol” festivalında ölkəmiz bir sıra beynəlxalq kinofestivallarının mükafatçısı olmuş, Azərbaycan Mədəniyyət Nazirliyi və "Azərbaycanfilm" kinostudiyasının dəstəyi ilə çəkilmiş rejissor İlqar Nəcəfin “Buta” bədii filmi ilə təmsil olunub.

Bununla yanaşı, tədbir çərçivəsində Böyük Azərbaycan şairi İmadəddin Nəsiminin 650 illik yubileyinin qeyd olunduğunu nəzərə alaraq, böyük şairimizin “Sığmazam” qəzəli xorvat və ingilis dillərində tədbir iştirakçılarına təqdim olunub.

Qeyd edək ki, “İpək Yolu - Dialoqa aparan yol” Beynəlxalq Marko Polo Festivalı Xorvatiya Prezidenti, Xorvatiyanın Turizm və Mədəniyyət nazirliklərinin himayəsi altında təşkil olunur. Tədbirin əsas məqsədi müxtəlif xalqlar arasında dialoqun inkişafı və Böyük İpək yolunun keçdiyi ölkələrdə formalaşmış unikal mədəniyyətlərin təbliğ edilməsindən ibarətdir.



© 2018 Azərbaycan Televiziya və Radio Verilişləri Qapalı Səhmdar Cəmiyyəti