Xalq artisti Lütfiyar İmanovun 90 illiyinə həsr olunan tədbir keçirilib

22 April 2019

"Azərkitab Kitab Təbilğatı Mərkəzi"ndə Xalq artisti, professor  Lütfiyar İmanovun 90 illiyinə həsr olunan tədbir keçirilib. Tədbirdə görkəmli  ifaçının yaradıcılıq yolundan, onun Azərbaycan musiqi  mədəniyyətinin, vokal sənətinin  inkişafındakı  xidmətlərindən danışılıb.

Xalq artisti Lütfiyar İmanovun yaradıcılığı çoxşaxəlidir. O, həm rəngarəng repertuarlı kamera müğənnisi, həm də  xalq  mahnılarının  gözəl ifaçısı olub. Sənətkarin  yaradıcılıq  bioqrafiyasında  ən parlaq   və yaddaqalan  məqamlardan  biri opera səhnəsində yaratdığı  Koroğlu obrazıdır. Hələ gənc yaşlarında böyük dirijor Niyazinin diqqətini  cəlb edən  Lütfiyar İmanov onun dəvəti ilə  opera teatrında  işləməyə başlayır. Koroğlu rolunda çıxış etməyi  də ona Niyazi təklif edir və 1959-cu ildə Moskvada  keçirilən Azərbaycan incəsənəti  10 günlüyündə  Böyük Teatrın səhnəsində Koroğlu obrazını  canlandıran Lütfiyar İmanov  operada  ilk və uğurlu  çıxışı ilə yadda qalır.  ”Sevil” orerasında  Balaş, ”Azad”da  Ayaz, ”Vaqif”də  Vaqif, ”Nərgiz”də Əlyar və başqaları  da  Lütfiyar İmanovun çıxış etdiyi  partiyalardır.

Tədbirdə çıxış edən  sənət adamları, ziyalılar  Lütfiyar İmanovun yaradıcılıq yolundan  söz  açdılar, onunla  bağlı xoş   xatirələrini bölüşdülər.



© 2018 Azərbaycan Televiziya və Radio Verilişləri Qapalı Səhmdar Cəmiyyəti