Pekində Beynəlxalq Film Festivalı işə başladı

17 April 2019

Bu günlərdə dünya kino aləminin diqqəti Çinin paytaxtına yönəlib. Belə ki, Pekində bir həftə davam edəcək  ənənəvi Beynəlxalq Film Festivalı işə başlayıb.

Festival təkcə çinli kinosevərlərin deyil, dünya kino aləminin il ərzində səbirsizliklə gözlədiyi hadisələrdən biridir. “Ev və ölkə” devizi altında keçirilən festival çərçivəsində müxtəlif forumlar, kinobazar, Pekin kinopanoramı, təqdimatlar, yeni filmlərin premyerası,  karnaval, ustad dərsləri keçirilir. Festivalın Təşkilat Komitəsi tədbirin əsas hadisəsi olan “Səma məbədi” mükafatı uğrunda müsabiqənin nüfuzunu yüksəlmək üçün münsiflər heyətinə dünyanın tanınmış kinematoqraflarını cəlb edib. Çin, Böyük Britaniya, Çili və digər ölkələrdən olan 7 nəfərlik münsiflər heyətinin rəhbəri tanınmış Amerikalı rejissor Rob Minkofdu.

“Səma mədədi” mükafatı ən yaxşı film, rejissor, kişi və qadın rollarının ifaçısı da daxil olmaqla 10  nominasiyada sahibini tapacaq. Mükafat uğrunda mübarizə aparan filmlərlə yanaşı, əlavə 500-ə yaxın film Pekinin 30 ən iri kinoteatrında nümayiş olunur. Bundan başqa, bəzi klassik filmlər İMAX (Aymaks) və 4K formatında yenidən təqdim olunacaq.

300-ə yaxın yerli və xarici kinorejissorun, ssenaristin, aktyorun  qatıldığı festival müddətində keçiriləcək tədbirlərdə 1 milyona yaxın filmsevərin iştirakı gözlənilir. Tədbir çərçivəsində bir neçə əməkdaşlıq müqaviləsi imzalanacaq. Ötən festivallarda imzalanan müqavilələrin ümumi dəyəri 15 milyard dollara yaxın olub.

Qeyd edək ki, dünyanın ən böyük ikinci kino bazarı olan Çində kassa yığımı ötən il 9 faiz çoxalaraq 9,1 milyard dollara çatıb. Mütəxəssislər hesab edir ki, qarşıdakı bir neçə il ərzində Çində film nümayişinin kassa yığımının ümumi məbləği 15 milyard dollara çatacaq.



© 2018 Azərbaycan Televiziya və Radio Verilişləri Qapalı Səhmdar Cəmiyyəti