“Art Tover”də növbəti fotosərgi Parisə həsr edilib

15 April 2019

Aprelin 14-də “Art Tover”də qalereyasında gənc fotoqraf Maya Bağırovanın monoxrom təsvirlərdən ibarət fərdi fotosərgisi açılıb.

“Frankofoniya həftələri” çərçivəsində reallaşan sərgi Fransanın ölkəmizdə səfirliyinin dəstəyi, “Arts Council”, Azərbaycan-Fransız İnstitutunun təşkilatçılığı ilə reallaşıb.

Tədbirdə BMT-nin Azərbaycandakı rezident əlaqələndiricisi Qulam İshaqzai, Fransanın ölkəmizdəki səfiri xanım Orelia Buşez və digər qonaqlar iştirak ediblər.

Tədbirdə çıxış edən Maya Bağırova bildirib ki, əvvəllər bir neçə sərgidə iştirak etsə də, bu onun ilk fərdi sərgisidir. 20 fotodan ibarət sərgidə o, Parisdə insanların görmədiyi bir azadlığı təsvir etdiyini söyləyib. Daha çox ağ-qara rənglərə üstünlük verən fotoqraf öz əsərlərində insanlara əsasən mənanı ötürməyə çalışdığını deyib. Foto-ideyalarda öz daxili dünyasını ifadə etdiyini söyləyən Maya Bağırova bu sahədə müəllimi olmadığını da qeyd edib.

Səfir Orelia Buşez çıxışında bu sərgidə iştirak etməkdən çox məmnun olduğunu deyib: “Maya Bağırovanın Fransanın ən nüfuzlu jurnallarından olan “Paris Maç” jurnalı ilə çalışması onun üçün çox böyük bir uğurdur”.

Sonra iştirakçılar 10 gün davam edəcək sərgi ilə tanış olublar.

Onu da qeyd edək ki, Maya Bağırova Bakı Musiqi Akademiyasında skripka üzrə təhsil alıb. Hazırda “Paris Maç” jurnalı ilə əməkdaşlıq edən fotoqraf Fransada fotojurnalistika üzrə təhsilini təkmilləşdirib.



© 2018 Azərbaycan Televiziya və Radio Verilişləri Qapalı Səhmdar Cəmiyyəti