"Mədəniyyət" kanalının direktoru: "Vətən sevgisini işimizdə, əməllərimizdə göstərməliyik"

24 İyul, 12:43 Sosial mediada paylaşın:

“Mədəniyyət” kanalının direktoru, politoloq Ramil Qasımovun APA-ya müsahibəsi:

- Ramil müəllim, bildiyimiz kimi, son günlər ölkəmizin mübarizə apardığı düşmən təkcə koronavirus deyil. İllərdir pusquda duran düşmənlərimiz də vəziyyətdən istifadə edərək ərazilərimizə hücuma keçdilər. Son günlər cəbhə bölgəsində yaşananlara münasibətinizi bilmək istərdik.

 - Hər bir azərbaycanlı vətənpərvəlik mövzusunda olan məsələlərə münasibət bildirməlidir. Bizim xalqımız ədalətli, humanist, ürəyiaçıq xalqdır. Biz öz torpaqlarımızı istəyirik. Bizim işğal altında olan torpaqlarımız tezliklə azad olunmalıdır və olunacaq da. Biz kiminsə torpağını istəmirik. Axırıncı hadisələrdə hər bir azərbaycanlı o gün həm şəhidlərini yad etdi, eyni zamanda, öz vətənpərvərliyini göstərdi. Həm də bunu göstərdi ki, xalq dövlətlə birdir, xalqın gücü birdir. Ona görə də fürsətdən istifadə edib bir mədəniyyət işçisi kimi öz təşəkkürümü bildirirəm. Ermənilər bilməlidir ki, biz heç bir zaman bununla barışmayacağıq. Onlar bilməlidir ki, bizə məxsus olan torpaqlarımız tezliklə qayıdacaq. “Mədəniyyət” kanalının “Mən də əsgərəm” layihəsi bizim yeni layihəmizdir. İyul hadisələri ilə bağlı kollektiv olaraq bu layihəni həyata keçirmək qərarına gəldik.

“Mən də əsgərəm” layihəsində mədəniyyət sahəsində çalışan həmkarlarımız - müğənnilər, rəssamlar, aktyorlar, fotoqraflar, heykəltaraşlar, şairlər vətənpərvərlik mövzusunda öz bacarıqlarını bizə təqdim edir. Biz də bunu kanal vasitəsilə geniş kütləyə çatdırmaq istəyirik. Vətən sevgisi hər zaman qəlbimizdədir. Ola bilər ki, biz qışqırmayaq, ucadan “Vətən, mən səni sevirəm” deməyək, biz onu əməllərimizdə, işimizdə, mədəniyyətimizdə göstərməliyik. Şərt deyil ki, incəsənət xadimləri əllərinə silah alıb getsinlər müharibədə, səngərdə vuruşsunlar. Onlar öz xidməti sahəsində mədəniyyətin keşikçiləri olmalıdılar. Bu mədəniyyət bizimdir. Bu mədəniyyəti biz, çağdaş, müasir dövrdə fəaliyyət göstərən hər bir mədəniyyət xadimi qorumalıdır. 

- Bilirik ki, siz səhnədə Milli Qəhrəman Mübariz İbrahimovun obrazını yaratmısınız. Bu ideya necə yarandı, tamaşa necə ərsəyə gəldi?

 - Mübariz İbrahimov kimi oğullar, şəhidlərimiz hər bir azərbaycanlının qəlbində yaşayır və yaşayacaq. Onun adının əbədiləşdirilməsi üçün dövlətimiz tərəfindən bir çox addımlar atılıb və atılır. Mən bir yaradıcı insan kimi hər zaman düşünürdüm ki, əgər Opera və Balet Teatrında “Koroğlu” operasında mif bir qəhrəmanı canlandırıramsa, axı bizim müasir qəhrəmanımız var, nəyə görə “Mübariz” musiqili tamaşası olmasın? Bu, həm aktualdır, həm də vacib. Ona görə də dostum Şahin Musaoğludan xahiş etdim ki, belə bir liberetto üzərində işləyək və səhnədə Mübariz İbrahimovu canlandıraq. Bəstəkar Nərminə Nağıyevadan xahiş etdim ki, bunun musiqisini yazsın, quruluşçu rejissor İnarə Babayevadan xahiş etdim ki, quruluş versin və “Mədəniyyət” kanalının təşkilatçılığı ilə bu musiqili tamaşa ərsəyə gəldi.

Çox xoşbəxtəm ki, Mübariz İbrahimovu səhnədə canlandırdım. Arzumdur ki, bu tamaşa gələcəkdə hansısa teatrın repertuarında olsun və məktəbdə oxuyan şagirdlərimiz bu tamaşaya gəlib baxsınlar, qəhrəmanlarımız daha da təbliğ olunsun. Təkcə Mübariz İbrahimov deyil, bu, gələcəkdə də davam etdirilməlidir. İyul hadisələri ilə bağlı gələcəkdə bir musiqili tamaşa olmalıdır, vətənpərvərlik mövzusunda əsərlər yazılmalıdır. Çünki xalqa, tarixə qalan məhz bu cür incilərdir. Xalqın qəhrəmanı necə yadda qalır? Filmlərlə, teatr tamaşaları ilə, onlara yazılmış povestlərlə, əsərlərlə, kitablarla. Ona görə də biz çalışmalıyıq ki, bu cür tamaşaları təbliğ edək. Bu da bizim borcumuzdur.

 - Ramil müəllim, bütün dünyanı əhatə edən və ölkəmizdən də yan keçməyən pandemiya incəsənətimizə, mədəniyyətimizə necə təsir göstərdi? 

- Pandemiya Azərbaycanın bir çox sahələrinə olduğu kimi, mədəniyyət sahəsinə də çox böyük ziyan vurub. Pandemiya ilə əlaqədar Azərbaycan mədəniyyətinə xidmət edən bir çox əbədiyaşarlarımızın yubiley mərasimləri keçirilmədi. Digər tərəfdən, “Mədəniyyət” kanalının təşkilatçılığı ilə “Azərbaycan estrada festivalı”nın keçirilməsi nəzərdə tutulurdu, keçirə bilmədik. “Azərbaycan aşıqları” festivalı keçirmək istəyirdik, bu da mümkün olmadı. Ənənəvi olaraq hər il Bəstəkarlar İttifaqının Mədəniyyət Nazirliyi ilə birgə “Şəki İpək Yolu festivalı” keçirilirdi. Bundan başqa, hər il Heydər Əliyev Fondunun təşkilatçılığı ilə “Qəbələ Beynəlxalq Musiqi festivalı” baş tuturdu. Dünyanın tanınmış musiqiçiləri Azərbaycana təşrif buyururdu və bu sənət mübadiləsi insanlarda böyük ruh yüksəkliyi yaradırdı, klassik musiqisevərlər üçün böyük bayrama çevrilirdi, bu festival da qaldı. Amma düşünürəm ki, hər qaranlıq gecənin bir işıqlı sabahı var. Tezliklə bizim mədəniyyət sahəsinə pandemiya zamanı vurulan zərbə aradan qaldırılacaq və biz itirdiklərimizi bərpa edəcəyik. "Mədəniyyət" kanalı pandemiya zamanı Təhsil Nazirliyi ilə birgə teledərsləri həyata keçirdi. Biz çox sevindik ki, "Mədəniyyət" kanalı bu işdə faydalı oldu. Məktəblilər üçün teledərslərin yayımlanması və onların "Mədəniyyət" kanalı vasitəsilə maariflənməsi bizim üçün çox sevindirici və qürurvericidir.

 - Sizin bir şüarınız var – “Bizi birləşdirən mədəniyyət”.“Mədəniyyət” kanalı ilə eyni adlı bir layihə də yayımlanır. Bu layihənin məqsədi nədir?

 - Mən “Mədəniyyət” kanalına təyin olunan zaman düşündüm ki, bizim özümüzün bir şüarımız olmalıdır. “Bizi birləşdirən mədəniyyət”in də əsas missiyası hər zaman bu olub ki, istedadlı gəncləri bir araya toplasın, bizim unudulmuş əbədiyaşarlarımızı təbliğ etsin. Mədəniyyətimizə nə faydamız dəyə bilərsə, bunu etmək bizim vəzifə borcumuzdur. Pandemiya zamanı düşündük ki, biz bu telelayihələri etsək, daha məqsədəuyğun olar, mədəniyyət sahəsində durğunluq yaranmaz. Bu gün də bu veriliş davam edir. “Bizi birləşdirən mədəniyyət” layihəsinin içərisində istər “Opera dünyası”, istər “XX əsrin operetta inciləri”, istər “Sərhədsiz musiqi”, istər “Muğam ustadları”, “Azərbaycan aşıqları” və s.

Bu layihələri həyata keçirmək bizim vəzifə borcumuzdur. Əsas odur mədəniyyətimizdə sağlam, müasir düşüncəli gənclər yetişsin və onlar da kanal vasitəsilə milyonlarla tamaşaçıya təqdim olunsun. “Mədəniyyət” kanalı hər zaman çalışır ki, yeni layihələri geniş kütləyə təqdim etsin. “Bizi birləşdirən dəyər” – “Mədəniyyət” kanalının şüarıdır və hər zaman bu adla, bu verilişlə tamaşaçılar qarşısında çıxış edəcək. O ki qaldı pandemiyadan sonrakı vaxta, düşünürük ki, “Azərbaycan aşıqları” festivalını keçirək, “Sərhədsiz musiqi” layihəsini daha geniş müstəvidə təqdim edək. Eyni zamanda o layihə çərçivəsində Azərbaycan operası ilə bağlı telefestivallar keçirməyi nəzərdə tuturuq.

 - Qarşıdan yeni mövsüm gəlir. “Mədəniyyət” kanalı mövsümə necə hazırlaşır? Tamaşaçıları hansı yeniliklər gözləyir?

 - “Mədəniyyət” kanalının öz tamaşaçısı var və kifayət qədərdir. Mədəniyyət təkcə musiqi demək deyil, mədəniyyətə məxsus olan bütün sahələri təbliğ etməyə çalışırıq. Yeni mövsümdə də təbii ki, yeni ideyalarımız var. Artıq rəhbərlik tərəfindən bizə yeni bir studiya təqdim olunub. Studiyanın son tamamlanma işlərini aparırıq. “Səhər çağı” verilişi artıq yeni studiyadan yayımlanacaq. “Teleradio” adlı yeni verilişimiz bu mövsümdən start götürəcək. Bundan başqa, yeni mövsümdə “Günün günorta çağı” adlı yeni verilişimiz başlayacaq. Bu verilişdə gündəlik aktual mövzular müzakirə olunacaq. Eyni zamanda, “Sənət Akademiyası” adlı yeni verilişimiz də start götürəcək.

Bu verilişi açmaqda məqsədimiz universitet tələbələrimizin təbliğinə xidmət edəcək. Azərbaycan Milli Konservatoriyası, Bakı Musiqi Akademiyası, Mədəniyyət və İncəsənət Universiteti, Bakı Dövlət Universiteti və müxtəlif universitetlərdən olan tələbələrimiz bu veriliş vasitəsilə öz bacarıq və istedadlarını nümayiş etdirə biləcək, vaxtaşırı onları geniş kütləyə təqdim edəcəyik. “Bizi birləşdirən mədəniyyət” layihəsi də yeni mövsümdən yeni formatda tamaşaçıların qarşısına çıxacaq. Eyni zamanda da telefestivallar olacaq. Bildiyiniz kimi, “Mədəniyyət” kanalının özünün təşkilatçılığı ilə artıq illərdir ki, xalq mahnıları, qədim musiqi alətləri, orqan musiqisi, Azərbaycan vokalçıları festivalları keçirilir. Bu festivallar davamlı olacaq.

 - Siz özünüz də yaradıcı insansınız. Öz yaradıcılığınızda hansı yeniliklər olacaq, qarşıda hansı planlar var?

 - Mən öz yaradıcılığımı saxlaya bilmərəm, çünki buna ixtiyarım yoxdur. “Mədəniyyət” kanalı ilə yanaşı, Akademik Opera və Balet Teatrında fəaliyyət göstərirəm, solist kimi çalışıram. Təbii ki, yaradıcılıq layihələrim çoxdur. Hazırda “Riqoletto” operasını hazırlayıram. Bildiyiniz kimi, bu il operamızın 100 illiyidir. Bununla əlaqədar olaraq, Azərbaycan operalarından ariyaları lentə almışam. Bu film-konsert yaxın vaxtlarda geniş kütləyə təqdim olunacaq. Bundan başqa özümün və sənət dostlarımın iştirak edəcəyi Azərbaycan operası-100” adı altında bir çox layihələr fikirləşirəm. Pandemiyadan sonrakı dönəmdə yeni bəstəkarlarımızın romanslarını təqdim etmək istəyirəm. 

- Son olaraq, Ramil müəllim, Mədəniyyət Nazirliyi ilə bundan sonra da əməkdaşlığa davam edəcəksinizmi? 

- Biz ümumi mədəniyyətimizə xidmət etməliyik. İstər “Mədəniyyət” kanalı, istər Mədəniyyət Nazirliyi Azərbaycan mədəniyyətinin təbliğinə xidmət edir. Bizim Mədəniyyət Nazirliyi ilə hər zaman əməkdaşlığımız olub, düşünürəm ki, bundan sonra da olacaq. Mədəniyyət nazirinin birinci müavini vəzifəsinə təyin olunan və nazir səlahiyyətlərini icra edən Anar Kərimovu təbrik edirəm. Sizin vasitənizlə demək istəyirəm ki, biz hər zaman “Mədəniyyət” kanalı olaraq Mədəniyyət Nazirliyinin yanındayıq, Anar müəllimi dəstəkləyirik. Düşünürük ki, pandemiyadan sonrakı dönəmdə mədəniyyət sahəsində bir çox yeniliklər olaca, müasir, kreativ layihələr həyata keçiriləcək. Bu layihələrin həyata keçirilməsində bizim nə kimi faydamız ola bilərsə, hər an Mədəniyyət Nazirliyinin yanındayıq. Necə ki, hər zaman olmuşuq. Bu gün də birgə əməkdaşlığa, dostluğa hazırıq. Əsas odur mədəniyyətimiz inkişaf etsin. 

CANLI YAYIM