Azərbaycan poeziyasının Ukraynadakı bələdçisi Pavel Movçanın 81 yaşı olub

16 İyul, 16:17 Sosial mediada paylaşın:

Azərbaycan poeziyasının Ukraynadakı bələdçisi, şair, tərcüməçi, siyasətçi, ictimai xadim, Taras Şevçenko adına Ümumukrayna Cəmiyyətinin rəhbəri Pavel Movçanın iyulun 15-də 81 yaşı tamam olub.

Pavel Movçan Azərbaycan ədəbiyyatının Ukrayna dilinə əsas tərcüməçilərindən biri sayılır. Onun istedadını hələ 1985-ci ildə şəxsən Ulu Öndər Heydər Əliyev vurğulamışdı.

Pavel Movçan Azərbaycanla bağlı xatirələrində deyir: “Azərbaycan... Nəsimi yaradıcılığı mənim üçün bu vaxta qədər bizə naməlum olan böyük fəlsəfə və mənəvi cərəyanlar dünyasına daxil olmaq idi. 1985-ci ildə Bakıda baş tutan ədəbiyyat günlərində mən Nəsiminin Ukrayna dilinə tərcümə olunmuş bir mətni ilə çıxış etdim. Çıxışdan sonra Heydər Əliyev məni şəxsən təbrik etdi və təşəkkürünü bildirdi. Ziyafət zamanı isə mənə yaxınlaşıb nə istədiyimi soruşdu. Mən cavab verdim ki, Nəsiminin Hələbdəki məzarını ziyarət etmək istərdim. Heydər Əliyev mənə dedi ki, heç bir problem yoxdur. Həqiqətən də tezliklə mənə şəxsən Heydər Əliyevin sayəsində Hələbə getmək qismət oldu. Heydər Əliyev qeyri-adi və intellektual səviyyəli insan idi. O, ədəbiyyatı çox gözəl bilirdi”.

Pavel Movçan Ukrayna ədəbiyyatının tanınmış klassikidir. Nadir istedadı, fundamental biliyi, o cümlədən, türk dilini bilməsi sayəsində Pavel Mixayloviç uzun illər Ukrayna auditoriyasına az məlum olan ədəbiyyatların yüksək və mürəkkəb mənalarını çatdıra bilib. Azərbaycan müəlliflərinin tərcüməsinə gəldikdə isə İmadəddin Nəsimi ilə yanaşı, Fikrət Qoca, Rəsul Rza, Məmməd Araz, Bəxtiyar Vahabzadə, Nəbi Xəzri və başqa şairlərdən tərcümələri göstərmək olar.

 

CANLI YAYIM