Yazıçı-dramaturq, II dərəcəli Dövlət müşaviri, Azərbaycan SSR əməkdar jurnalisti Aqşin Babayev vəfat edib.

Aqşin Babayev 1936-cı ildə anadan olub. 1959-cu ildə Azərbaycan Dövlət Universitetinin Filologiya fakültəsini bitirib. Əmək fəaliyyətinə tələbə ikən Respublika Radiosunda başlayıb. 10 il (1969-1979) ingilis, fransız, alman və ispan dillərində çap olunan “Moskou nyus” qəzetinin Azərbaycan üzrə xüsusi müxbiri olub.

1959-cu ildən 1991-ci ilə qədər Azərbaycan Dövlət Televiziya və Radio Verilişləri Komitəsində çalışıb, 15 il (1976-cı ildən) Azərbaycan Radiosu və xarici verilişlər üzrə sədr müavini olub.

1991-cı il mart ayının 1-də Milli Məclisdə yaradılmış mətbuat xidmətinin rəhbəri olub. O, bu vəzifədə 15 il işləyib.

Aqşin Babayevin ilk hekayəsi 1958-ci ildə “Oktyabr işıqları” almanaxında çap olunub.

Dövri mətbuatda işıq üzü görən və kitablarında toplanmış oçerkləri, reportajları, məqalələri yüzlərlədir. A.Babayevin jurnalist yaradıcılığında Ulu Öndər Heydər Əliyevə, onun davamçısı Prezident İlham Əliyevə dərin rəğət hissləri xüsusi yer tutur. “Heydər Əliyevin jurnalistika məktəbi”, “Qurtuluş davam edir”, “Allah sizi Azərbaycanımız üçün qorusun”, “Heydər Əliyev haqqında düşüncələr”, “Hamımızın olan Azərbaycanı sevin” portret oçerkləri müxtəlif qəzet və jurnallarda çap olunub.

A.Babayev 1970-ci ildə “Əmək rəşadətinə görə” medalı ilə təltif edilib, 1987-ci ildə “Əməkdar jurnalist” fəxri adına, 2004-cü ildə II dərəcəli Dövlət müşaviri rütbəsinə layiq görülüb.

“Azərbaycan Televiziya və Radio Verilişləri” Qapalı Səhmdar Cəmiyyətinin kollektivi adından mərhumun ailəsinə və yaxınlarına dərin hüznlə başsağlığı veririk.

Allah rəhmət eləsin!