Mədəniyyət Nazirliyi və “Kreativ Azərbaycan” portalı incəsənət nümayəndələrini dəvət edir

18 Aprel, 14:48 Sosial mediada paylaşın:

Mədəniyyət Nazirliyi və “Kreativ Azərbaycan” portalı (creative.az) ölkəmizdə olan bütün incəsənət nümayəndələrini, yaradıcı şəxsləri UNESCO-nun “ResiliArt” hərəkatına qoşulmağa və aktiv iştiraka dəvət edir.

Bu barədə Mədəniyyət Nazirliyindən məlumat verilib.

Məlumata əsasən, sənətkarları dəstəkləmək və hər kəsin mədəniyyətə çıxışını təmin etmək üçün razılaşdırılmış və qlobal addımlara ehtiyac duyulur.

Yeni koronavirus nəticəsində meydana çıxan səhiyyə böhranının nəticəsində dünya iqtisadiyyatı geriləməyə başlayaraq, dünya iqtisadiyyatı 1 trilyon ABŞ dolları məbləğində itkiyə məruz qalıb. (BMT-nin Ticarət və İnkişaf üzrə Konfransı (UNCTAD)). Dünyada milyonlarla insanın rahatlıq və əlaqələnmə mənbəyi kimi mədəniyyətə müraciət etdiyi bir dövrdə COVID-19 virusunun təsiri mədəniyyət sahəsindən də yan keçməyib. UNESCO-nun irsinə daxil edilmiş məkanların 80 faizdən çox hissəsi bağlanaraq yerli icmaların və mədəniyyət sahəsində fəaliyyət göstərən yerli mütəxəssislərin həyatına təsir göstərib. Muzey, teatr və kinoteatrlar daxil olmaqla bir çox mədəniyyət müəssisələri və qurumları hər gün milyonlarla məbləğ vəsait itirirlər və bəziləri öz əməkdaşlarını işdən azad etmək məcburiyyətində qalıblar. Pandemiyadan öncə belə bu sahələrdə yarım günlük əsaslarla, qeyri-rəsmi işləyən və digər formada ağır müqavilələrlə çalışan sənət adamlarının böyük hissəsi gündəlik ehtiyaclarını ödəməkdə çətinlik çəkirlər. Bu gün biz mədəniyyət sahəsində fövqəladə bir vəziyyət yaşayırıq.

Məhz bu səbəbdən UNESCO yeni bir hərəkata – “ResiliArt” (dözümlü incəsənət) hərəkatına başlayır.

Hərəkat mədəniyyət sahəsinin aparıcı professionalları ilə eksklüziv qlobal müzakirə təşkil etməklə yaradıcı sahələrin böhran şəraitində indiki vəziyyətinə işıq salmaq, eləcə də sosial media vasitəsilə həm tanınmış, həm də yetişməkdə olan incəsənət adamlarının səsini və təcrübələrini yaymaq məqsədi daşıyır. Ümumilikdə bu hərəkat COVID-19 pandemiyasının bu sektora hərtərəfli təsiri barədə məlumatlılıq səviyyəsini artırmaq və incəsənət adamlarını bu böhran zamanı və böhrandan sonra da dəstəkləməyi hədəfləyir.

Açılış debatı aprelin 15-də, Ümumdünya İncəsənət Günündə, Beynəlxalq Müəlliflər və Bəstəkarlar Cəmiyyətlərinin Konfederasiyası (CISAC) ilə birgə tərəfdaşlıq çərçivəsində reallaşıb.

Mədəniyyət sənayesi mütəxəssisləri hərəkata qoşulmağa və “ResiliArt” debatlarını öz bölgələrində təşkil etməyə dəvət edilir. Bütün mədəniyyət dəyər zəncirinə vurulmuş bu zərbənin yaradıcı iqtisadiyyat üzərində uzunmüddətli təsirləri olacaq. “ResiliArt” hərəkatının məqsədi də pandemiya bitdikdən sonra uzun müddət müzakirələrin, məlumat mübadiləsinin və ictimai vəkillik səylərinin davamlılığını təmin etməkdir.

“ResiliArt” hərəkatı ilə əlaqədar hər hansı suallar üçün, UNESCO ilə əlaqə saxlamaq lazımdır:resiliart@unesco.org

CISAC ilə əlaqə: communications@cisac.org və ya www.cisac.org

CANLI YAYIM