Prezident İlham Əliyevin İçərişəhərin UNESCO-nun Ümumdünya İrs Siyahısına daxil edilməsinin 20 illiyinin qeyd olunması haqqında Sərəncamına əsasən, İçərişəhər Dövlət Tarix-Memarlıq Qoruq İdarəsi tədbirlər planı hazırlayıb.

İdarənin aparat rəhbəri Riyad Qasımov keçirilən mətbuat konfransında bildirib ki, həm ölkə daxilində, həm də xaricdə İçərişəhərin tanıdılması ilə bağlı geniş tədbirlərin həyata keçirilməsi nəzərdə tutulur. Bundan başqa, xarici muzeylərlə işlər davam etdiriləcək.

Apreldə isə İstanbuldan Ağqoyunlu dövlətinə aid 17 eksponat gətiriləcək və ilin sonunadək nümayiş olunacaq.

R.Qasımovun sözlərinə görə, bu ilin iyun ayında Parisdə UNESCO-nun Baş Qərargahında İçərişəhərlə bağlı təntənəli tədbirin keçirilməsi nəzərdə tutulub: “Həmin tədbirlər çərçivəsində İçərişəhərin təqdimatı, İçərişəhərin tarixinə aid fotosərgi təşkil olunacaq və İçərişəhərin ənənəvi incəsənət mərkəzinin “Dastan” brendinin məhsullarının təqdimatı olacaq”.