Nigeriyada Beynəlxalq Qadınlar Təşkilatının təşkilatçılığı ilə Laqos şəhərində keçirilmiş Afrikanın ən böyük xeyriyyə tədbirində 36 ölkənin nümayəndəsi xalqlarının tarixini, mədəniyyətini, mətbəxini və musiqisini nümayiş etdirib.

Ölkəmizi tədbirdə Nigeriyada yaşayan azərbaycanlı, Azərbaycanın Dostları Təşkilatının prezidenti Billurə Bernard təmsil edib.

B. Bernard festivalda qonaqlara Azərbaycanın ləziz yeməkləri - dolma, plov, Ləzzət Kulinariya evinin sponsorluğu ilə paxlava, şəkərbura və Aqrar Tədarük və Təchizatın dəstəyi ilə Azərbaycan məhsulları təqdim olunub. Nigeriya mediasına və iştirakçılara Azərbaycanın tarixi və mədəniyyəti barədə geniş məlumat verilib.

Xeyriyyə tədbirinə müxtəlif ölkələrin Nigeriyada akkreditə olunmuş səfirləri, Laqosda fəaliyyət göstərən məşhur şirkətlərin nümayəndələri və rəsmi şəxslər qatılıb. Tədbirin açılış və bağlanış mərasimlərində Azərbaycanı milli geyim və bayrağımızla Antuan və Billurə Bernardlar təmsil edib.

Tədbirdə ölkəmizin təmsil olunması fransız şirkəti “Pace”, “Aqrar Tədarük və Təchizat” ASC, Ləzzət Kulinariya evi, Azərbaycan Milli Geyim Mərkəzi, Türk Hava Yollarının dəstəyi ilə reallaşıb.

“Festivalın təşkilində əsas məqsəd Nigeriyada yaşayan müxtəlif dövlətlərin vətəndaşlarının öz ölkələrini təmsil və təbliğ etmək, özlərinə məxsus təamları bölüşmək, musiqiləri, mədəniyyətləri və tarixləri barədə iştirakçılara dolğun məlumatlar verməkdən ibarətdir. Aksiyadan əldə olunan vəsaiti Nigeriyadakı məktəb, xəstəxana, uşaq və qocalar evlərinə yönəldilir”,- deyə B. Bernard bildirib.