Azərbaycan kulinarlarının növbəti uğuru

10 Yanvar, 15:44 Sosial mediada paylaşın:

Yanvarın 10-da Trend İnformasiya Agentliyində Türkiyənin İstanbul şəhərində keçirilən 17-ci Beynəlxalq Kulinariya Yarışmasında iştirak edən Azərbaycan Milli Kulinariya Assosiasiyasının (AMKA) əldə etdiyi nəticələrlə bağlı mətbuat konfransı keçirilib.

Mətbuat konfransında Azərbaycan Milli Kulinariya Mərkəzinin baş direktoru Tahir Əmiraslanov TAŞFED-in (Türkiyə Aşçılar Federasiyası) təşkil etdiyi beynəlxalq çempionatda 46 ölkənin iştirak etdiyini söyləyib. O, WACS-ın (Dünya Kulinariya Birliyi) prezidenti Tomas Quqlerin də qatıldığı yarışmada ölkəmizin uğur qazanmasını yüksək qiymətləndirib.

Qeyd edib ki, yarışma çərçivəsində beynəlxalq münsif kursları da təşkil olunub. Bu kurslarda dünyadan 19 nəfər mütəxəssis, o cümlədən AMKA-nın üzvləri, usta aşpazlar Ağa Salamov və Ruslan Şıxıyev də iştirak edib. Bildirib ki, aşpazların kurslarda iştirakı sponsorlar tərəfindən maliyyələşdirilib. Lakin kursun keçirilməsində prosedur qaydaları pozulduğundan nəticələrin verilməsi təxirə salınıb. Hazırda məsələ araşdırılır.

Bildirib ki, yarışmada Azərbaycan həm münsiflər heyətində, həm də iştirakçı kimi təmsil edilib.

Azərbaycan Milli Kulinariya Assosiasiyasının İdarə Heyətinin üzvü, təcrübəli usta aşpaz Gülnar Ələsgərova bildirib ki, yarış zamanı qızıl medala layiq görülüb. “Yarış zamanı çox həyəcanlı idim. Xörəyi hazırlamağa bizim 30 dəqiqə vaxtımız olsa da, mən bu işin öhdəsindən gəldim”, - deyə G.Ələsgərova vurğulayıb.

Yarışmada digər mütəxəssis Nailə Kərimova həm gümüş, həm qızıl, gənc aşpaz Qurbanəli Hüseynov isə gümüş medal qazanıb.

Qeyd edək ki, ölkəmizi təmsil edən üç nəfərlik komanda 4 sinif yarışdan 2 qızıl və 2 gümüş medal əldə edib.

CANLI YAYIM