"Mədəniyyət" telekanalının yeni layihəsi olan, Azərbaycanda ilk dəfə keçirilən Azərbaycan vokalçıları festivalı çərçivəsində "Azərbaycan Opera İfaçılığı Antologiyası"nın təqdimat mərasimi keçirilib.

Soprano və Mezzo-soprano səslər üçün nəzərdə tutulmuş kitabın təqdimatında Antoligiyanın ideya müəllifi, tərtibatçısı əməkdar artist İnarə Babayeva və elmi redaktor Əməkdar incəsənət xadimi, professor Elnarə Dadaşova çıxış ediblər. Onlar kitabın elmi əhəmiyyətini vurğulayaraq, tədris metodikasında da antologiyanın çox lazımlı addım olduğunu qeyd ediblər. Təqdimatdan sonra isə Azərbaycan Televiziyası və Radiosunun Niyazi adına Simfonik Orkestrinin ifasında bir-birindən maraqlı musiqi nümunələri vokalçılarımızın ifasında tamaşaçılara təqdim olunub.

Dahi bəstəkar Jorj Bizenin "Karmen" operasından uvertüra ilə açılan və müasir Azərbaycan bəstəkarı Pilə Axundovanın "Məhsəti" operasından ariya ilə tamamlanan konsert tamaşaçıların zövqünü oxşayıb.

Fotolar Rüstəm İsmayılovundur