“Azərbaycantelefilm”in rejissorundan yubiley təbriki

10 Dekabr, 17:52 Sosial mediada paylaşın:

Salam, “Azərbaycantelefilm!”

Bu doğma sözləri eşidəndə yadıma gəncliyim düşür. Heç təsadüfi deyil ki, Azərbaycan Televiyasında 40 il işləmişəm. Keçən əsrin 60 ci illərində Azərbaycan Televiziyasına gəlib çox çətin, mürəkkəb və maraqlı yaradıcılıq yolu keçmişəm.

Bu müddət ərzində 50-dən çox sənədli film və 1500-ə qədər ictimai-siyasi verilişlər hazırlamışam.

Yaradıcılığımın ən yüksək nöqtəsi umumilli lider, Ulu Öndər Heydər Əliyevə həsr edilmiş silsilə verlişlərlə bağlıdır.

“Azərbaycantelefilm”in keçdiyi bu 60 illik yaradıcılıq yolunda, bu bayram ərəfəsində onun korifeylərini, ustadlarını xatırlamamaq günahdır. Axı məhz onların ağlı və cəsarəti nəticəsində Azərbaycan Televiziyasında yeni qurum – “Telefilm” yaradıldı.

İshaq İbrahimov, Arif Babayev, Rüfət Şabanov, Nazim Abbasov, Arif Qazıyev, Vasif Babayev, Nəriman Şıxəliyev, İsgəndər Kərimov, Tofiq Tağıyev... Onlar məhz burada yeni məktəb, yeni istiqamət – televiziya kino məktəbi yaratdılar.

Ədəbiyyat və tərcümə sahəsində nüfuzlu mütəxəssis olan İshaq müəllim İbrahimov mənim iç dünyamı dürüst anlamaqla kifayətlənmir, həm də ona praktik kömək göstərir və yaradıcılıq dəstəyini əsirgəmirdi. Məhz bu köməyin sayəsində mən “Azərbaycantelefilm” Yaradıcılıq Birliyində bir-birindən maraqlı sənədli filmlər çəkməyə başladım. Çox keçmədən rejissoru olduğum “Qırmızı qələm”, “Sevilin bacıları”, “Neft daşları”, “Mingəçevir”, “Şahdağın ətəyində”, “And”, “Həyatın cizgiləri”, “Naxçıvan” kimi maraqlı sənədli filmlər ekrana çıxdı. Qeyd etmək lazımdır ki, o vaxt qayda belə idi ki, müttəfiq respublikalarda çəkilən filmlərin hamısı dövlət sifarişi sayılırdı. Moskvada xüsusi komissiya bu filmləri qəbul edirdi və daha çox bəyənilən əsərlər ümumittifaq ekranında - mərkəzi televiziyada nümayiş etdirilirdii. Çəkdiyim bütün filmlər həmişə yüksək qiymətə layiq görülüb və böyük ekranlarda göstərilib.

Rejissorluq ən gözəl peşələrdən biridir. Gözəlliyi ondadır ki, bu peşə sahibinin dünyaya, gerçəkliyə, hadisələrə fərqli baxışı, bir də qeyri-adi istedadı olur. İstedad ilahi qabiliyyətdir və ilk növbədə istənilən ideyaya, məzmuna müəyyən forma verməkdə üzə çıxır. Mən o zaman bu insanları tanıyanda televiziya yaradıcılığı və rejissor işi haqqında bu qənaətlərim təzə-təzə formalaşırdı. Onlarla uzun illər birgə unudulmaz fəaliyyətimiz mənim bu düşüncələrimə yeni miqyas verdi, təsəvvürlərimə əlavə rənglər qatıb onu xeyli əlvanlaşdırdı.

Mən yuxarıda qeyd etdiyim ustadların hamısı ilə işləmişəm, onlardan çox şey öyrənmişəm. Bu televiziya korifeylərini necə unutmaq olar?

Bu bayram ərəfəsində - mən öz adımdan və xaricdə yaşayan azərbaycanlılar adından başda dövlət başçısı olmaqla “Azərbaycantelefilm”in heyətini 60 illik yubiley bayramı münasibətilə təbrik edir və hamıya can sağlığı və yeni yaradıcılıq müvvəqiyyətləri arzulayıram.

“Azərbaycantelefilm”in rejissor və ssenaristi
Əhməd Abdullayev