Tokionun Haçioci şəhərində 40-cı dəfə təşkil edilən “İçou festivalı” böyük maraqla qarşılanıb

18 Noyabr, 14:59 Sosial mediada paylaşın:

Tokionun Haçioci şəhərində 40-cı dəfə təşkil edilən “İçou festivalı” həm yerli sakinlər, həm də bu şəhərin qonaqları tərəfindən böyük maraqla qarşılanıb.

Oyvako-ço yaşayış məntəqəsindən başlayaraq Takao stansiyasınadək uzanan Koşu şosesi boyunca təqribən 4 kilometr məsafədə təşkil edilən festivalda on minlərlə insan iştirak edib. Yolun hər iki tərəfində əkilmiş qinkqo ağaclarının payızın rənglərinə bürünən yarpaqları festival iştirakçılarının gözlərini oxşayır. Festivalın adı da məhz bu ağacların yapon dilində olan adından götürülüb.

Nişi-Haçiyoci stansiyasından çıxıb Takao dağı istiqamətində, festivalın əsas hissəsinin yerləşdiyi Minamiasa çayına doğru hərəkət edirik. Yol boyunca Haçiyoci şəhərinin müxtəlif ustalarının nümayiş etdirdiyi sənət əsərləri düzülüb. Burada həm uşaq oyuncaqları, həm məişət əşyaları, həm də rəngarəng geyimlərə geniş yer verilib. Yapon mətbəxinin ləziz yeməkləri və müxtəlif içkilər də öz yerində.

Haçiyoci şəhərinin mərkəzindən keçən Koşu şosesi boyunca yerləşən təqribən 770 qinkqo ağacının yarpaqları günəşin şüaları altında bərq vuran parlaq qızılı rəngi ilə diqqəti cəlb edir. Həmin ağaclar ilboyu bu yolu çiçəkləri və fəsilə uyğun müxtəlif görüntüləri ilə bəzəyir.

“İçou festivalı”nın təşkilində məqsəd Haçiyoci şəhərinin sakinlərini bir araya gətirərək, tarixi ənənələri yaşatmaq, öz parlaqlığı ilə seçilən qədim və zəngin mədəniyyəti gələcək nəsillərə ötürməkdir. Burada keçirilən çoxsaylı tədbirlərin, rəngarəng rəqslərin, musiqi nömrələrinin təşkilatçıları da məhz yerli sakinlərdir.

İki gün davam edən festival insanların həm mədəni istirahətinə, həm təmiz havada gəzintisinə, həm də köhnə tanışların bir araya gələrək xoş istirahət keçirmələrinə səbəb olur.