Azərbaycanın televiziya kanalları HD formatında yayıma başlayacaq.

Milli Televiziya və Radio Şurasından bildirilib ki, "Azerspace-1" peykindən yayımlanan televiziya kanalları yanvarın 28-dən yüksək dəqiqli formatda yayıma keçəcək. Bu, "Azərkosmos", Milli Televiziya və Radio Şurası, "Radio-Televiziya Yayımı və Peyk Rabitəsi" İstehsalat Birliyi və Dövlət Radiotezliklər İdarəsinin birgə razılığına əsasən, yerli televiziya kanallarının yayımında təsvir keyfiyyətinin daha üstün səviyyəyə gətirilməsi məqsədilə tətbiq olunur. Yayım texnologiyası "MPEG-2" sıxlaşdırma metodundan "MPEG-4" sıxlaşdırma metoduna keçiriləcək.

Qeyd edək ki, HD formatlı təsvirdə piksel sayı bir neçə dəfə çox olur. Bu isə təsvirin keyfiyyətinin yüksək olmasını təmin edir, nəticə etibarilə tamaşaçıya daha dəqiq və aydın görüntü izləmək imkanı verir.