Birinci Qarabağ müharibəsi iştirakçısı Vəfa Dəmirçioğlunun (Mansurova) xatirəsinə həsr olunmuş tədbir keçirilib

15 Noyabr, 16:38 Sosial mediada paylaşın:

Noyabrın 12-də H.Aslanov adına Mərkəzi Zabitlər Evində Birinci Qarabağ müharibəsi iştirakçısı Vəfa Dəmirçioğlunun (Mansurova) xatirəsinə həsr olunmuş tədbir keçirilib.

Tədbirdə Azərbaycan Respublikası Silahlı Qüvvələrinin əməkdaşları, mədəniyyət, incəsənət xadimləri, məktəb müəllimləri və şagirdlər iştirak ediblər.

Tədbirdə ilk əvvəl ümummilli lider Heydər Əliyevin və Azərbaycanın müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib, Dövlət Himni səsləndirilib.

Şəhidin göstərdiyi qəhrəmanlıqlar haqqında geniş məlumat verilib. Bildirilib ki, Vəfa Dəmirçioğlu bir çox igid, qəhrəman Azərbaycan xanımlarının, sərkərdə, döyüşçü el qızlarının, sələflərinin igidlik səhifəsini yeniləyərək, tarixdə yeni bir silinməz qəhrəmanlıq səhifəsi yazıb.

Daha sonra şagirdlərin ifasında Vəfa Dəmirçioğluna həsr olunmuş şeirlər tədbir iştirakçılarında xoş təəssürat oyadıb. Tədbir vətənpərvərlik mövzusunda səslənən ifalar ilə davam edib.

Qeyd edək ki, Vəfa Dəmirçioğlu 1966-cı il iyulun 23-də Qazax rayonunun Daş Salahlı kəndində anadan olub. 1973-1983-cü illərdə kənddəki 2 nömrəli orta məktəbdə təhsil alıb. O, düşüncəsi, təəssübkeşliyi, zirəkliyi ilə həmişə seçilib.

O, 1993-cü ildə əlinə silah götürüb doğma kəndi Daş Salahlını qorumağa qalxıb.

Düşmənə qarşı ayıq-sayıq dayanmasında böyük fədakarlıq göstərib. Vəfa Dəmirçioğlu səngərdə döyüş zamanı aldığı beyin zədəsi nəticəsində 6 ay xəstə yatıb, lakin vaxtsız əcəl 1998-ci il aprelin 25-də Vəfa Dəmirçioğlunu sıralarımızdan aparıb.

Vəfatından 19 il sonra Qazax Rayon İcra Hakimiyyətinin dəstəyi ilə rayonda yerləşən Şəhidlər xiyabanının görkəmli bir yerində onun adına “Şəhidlərin qız qardaşı-Vəfa Mansurova (Dəmirçioğlu)” bulaq xatirə-kompleksi inşa olunub.

CANLI YAYIM