Azərbaycan Respublikasının Mədəniyyət Nazirliyi və Teatro.az portalı tarixi qələbəmizi əbədiləşdirmək məqsədilə “4.4 Qısa Tamaşalar Festivalı”na tamaşa qəbulu elan edib.

Xalqımızın haqq savaşındakı qalibiyyətini Azərbaycan teatr tarixində əbədiləşdirməklə yanaşı, pandemiya səbəbindən teatr mühitindəki sükunəti də aradan qaldırmağa, teatr sənətinin təbliğinə və inkişafına xidmət etmək məqsədilə Mədənyyət Nazirliyi və Teatro.az portalı “4.4 Qısa Tamaşalar Festivalı”na tamaşa qəbulu elan edib.

Festival çərçivəsində ölkədə fəaliyyət göstərən dövlət teatrları, özəl teatrlar, eləcə də, fərdi sənətkarlar müsabiqəyə tamaşalar təqdim edəcəklər. Müsabiqə şərtlərinə əsasən, film formatında hazırlanmış tamaşalar da qəbul olunacaq. Təqdim olunmuş tamaşalar oktyabrın 15-dən sonra tərtib olunan proqrama əsasən 1-4 noyabr tarixində nümayiş olunacaq. Festivalın bağlanışı isə 5 noyabr tarixində nəzərdə tutulub. Festival çərçivəsində ən önəmli şərtlərdən biri isə 15 dəqiqəlik xronometraja əməl olunmaqla qısa tamaşaların hazırlanmasıdır.

Təqdim edilən tamaşalara janr məhdudiyyəti qoyulmur. Festival üçün tamaşalar oktyabrın 15-nə kimi qeyd olunan ünvanda qəbul olunacaqdır. Müsabiqə ilə bağlı daha ətraflı məlumatı nazirliyin saytından əldə edə bilərsiniz.

Ədiqə Mustafayeva, Emin Tağıyev