Türk dünyasının iftixarı, böyük filosof Yunus Əmrənin vəfatının 700 illiyi ilə əlaqədar Ankarada “Türk dilinin Anadoluda yazı dilinə çevrilməsi” mövzusunda beynəlxalq simpozium təşkil olunub.

Əvvəlcə rəsm, təsviri incəsənət, qrafika və heykəltəraşlıqdan ibarət “Gəl gör məni” sərgisinin açılışı olub.

Simpoziumun rəsmi açılışında Türkiyənin mədəniyyət və turizm nazirinin müavini Nadir Alparslanın, Beynəlxalq Türk Mədəniyyəti Təşkilatının (TÜRKSOY) Baş katibi Düsen Kaseinovun, Türk dili qurumunun rəhbəri Gürer Gülsevin, Yunus Əmrə İnstitutunun sədri Şərəf Atəşin, Atatürk Mədəniyyət, Dil və Tarix ali qurumunun rəhbəri Muhammət Həkimoğlunun çıxışları dinlənilib.

Milli Məclisin deputatı, Azərbaycanda Atatürk Mərkəzinin rəhbəri, akademik Nizami Cəfərov simpozium çərçivəsində keçirilən “Müqayisəli türk ləhcələri lüğəti kitabının otuz illiyi və türk dünyasında türkologiya” mövzusundakı panellərdə çıxış edib.

Bu paneldə çıxışçı alimlər 1991-ci ildə türk dünyasının alimləri tərəfindən hazırlanmış “Müqayisəli türk ləhcələri lüğəti” kitabının çap olunmasının 30 illiyi ilə əlaqədar fikir və mülahizələrini bölüşüblər. Türk dilinin yaranması, yazı dilinə çevrilməsi, keçdiyi inkişaf yolları, qollara ayrılması, türk ləhcələri, müasir dövrdə türk dillərinin vəziyyəti, adıçəkilən kitab və sair məsələlər ətrafında səmərəli müzakirələr aparılıb.

Qeyd edək ki, “Müqayisəli türk ləhcələri lüğəti” kitabını hazırlayan alimlər TÜRKSOY tərəfindən simpoziuma dəvət olunublar. Məqsəd bu sahədə gələcək əməkdaşlıq imkanlarını və perspektivləri müzakirə etməkdir. Həmin kitabın Azərbaycan bölməsi mərhum alim Ələddin Əliyev tərəfindən hazırlanıb.

Məlumat üçün bildirək ki, Azərbaycan Milli Məclisinin deputatı, AMEA-nın vitse-prezidenti akademik İsa Həbibbəylinin iyulun 13-də keçiriləcək paneldə çıxışı nəzərdə tutulub.

Üç gün davam edəcək simpoziumda görkəmli alimlər böyük filosofun həyat və fəaliyyətinə dair müzakirələr aparacaqlar.