Şəhid övladları AzTV-də

10 İyul, 14:52 Sosial mediada paylaşın:

44 günlük Vətən müharibəsində şəhidlik zirvəsinə ucalan qəhrəmanlarımızın övladları üçün Azərbaycan Televiziyasına ekskursiya təşkil olunub.

AzTV-nin Sosial media və ictimaiyyətlə əlaqələr şöbəsinin məlumatına görə, "Qaliblər düşərgəsi" layihəsi çərçivəsində təşkil olunan ekskursiyada Bakıdan və Azərbaycanın regionlarından 100-dən çox uşaq iştirak edib.

Uşaqlar Azərbaycan Televiziyasının studiyalarına baxıb, verilişlərin hazırlanması prosesi ilə tanış olublar. Bundan başqa, televiziyanın həyətində gəzinti təşkil olunub.

“Azərbaycan Televiziya və Radio Verilişləri” QSC-nin sədri Rövşən Məmmədov uşaqların sağlam və firavan böyüməsinin, rifahının yüksəldilməsinin dövlət siyasətinin başlıca vəzifələrindən biri olduğunu qeyd edib, uşaqları maraqlandıran sualları cavablandırıb. Həmçinin 44 günlük Vətən Müharibəsi zamanı qazanılan zəfərdə jurnalistlərin də rolunu vurğulayan televiziya rəhbəri şəhidlərimizi dərin ehtiramla yad edib, qazilərimizin tezliklə sağlamlıqlarına qovuşmalarını arzulayıb.

Şəhid övladlarının Azərbaycan Televiziyasına ekskursiyasının təşkilində əsas məqsəd onların  intellektual və emosional inkişafına dəstək vermək, uşaqların yay tətilini daha da maraqlı və yaddaqalan etməkdir.

CANLI YAYIM