Faşizm üzərində qələbənin 76-cı ildönümündə Mədəniyyət TV-də Sovet İttifaqı Qəhrəmanı, polkovnik Həbibulla Hüseynovla bağlı film nümayiş olunacaq.
9 may saat 16:50-də yayımlanacaq “Qürbətdə qalan məzar” adlı film real faktlar əsasında çəkilib.
Mədəniyyət Nazirliyinin “Yaddaş” sənədli filmlər studiyasında çəkilmiş filmin ideya müəllifi H.Hüseynovun gəlini Elmira Hüseynovadır. Quruluşçu rejissoru Cavid İmamverdiyev, ssenari müəllifləri Qasım Səfəroğlu və Cavid İmamverdiyevdir.
Çəkilişlər Azərbaycanla yanaşı Belarusiyada, Litvada, Rusiyada baş tutub. Filmdə arxiv kadrlardan da istifadə olunub.
“Qürbətdə qalan məzar” Minsk şəhərində keçirilən 2-ci “Euroasia.doc” MDB ölkələrinin sənədli filmlər festivalında iştirak edib və festivalın final mərhələsində nümayiş etdirilərək “İnsan taleyi” nominasiyasında mükafata layiq görülüb.
Ailə, Qadın və Uşaq Problemləri üzrə Dövlət Komitəsinin keçirdiyi “Ailə” kinofestivalında isə “Ən yaxşı rejissor işi”nə görə mükafat alıb.
Filmdəki kadrarxası mətni mərhum diktor, Xalq artisti Rafiq Hüseynov oxuyub. Xatırladaq ki, bu film Xalq artistinin həyatında sonuncu ekran işi olub.
Həbibulla Hüseynov Böyük Vətən müharibənin ilk günlərindən ön cəbhədə döyüşüb. 1945-ci ilin 6 aprelində 3-cü Belarus cəhbəsi Zenlaynd yarımadasını düşməndən azad edərkən 35 yaşlı komandir Qaydau kəndi yaxınlığında - qələbənin bir addımlığında qəhrəmancasına həlak olub.
29 iyun 1945-ci ildə SSRİ Ali Sovetinin Rəyasət Heyətinin Fərmanı ilə qvardiya polkovniki Hüseynov Həbibulla Eynulla oğlu Sovet ittifaqı qəhrəmanı adına layiq görüldü (ölümündən sonra). Düşmənlə döyüşdə göstərdiyi igidlik və şücaətinə görə polkovnik Hüseynov Həbibulla Eynulla oğlu aşağıdakı orden və medallara layiq görülmüşdür:
- İki Döyüş Qırmızı Bayraq ordeni;
- Qırmızı Ulduz ordeni;
- Birinci dərəcəli Böyük Vətən Müharibəsi ordeni;
- Stalinqadın qorunması üçün verilən orden;
- Kenisberqin alınması üçün verilən orden.
