Hüseynağa Atakişiyev… Rejissor, aktyor… O, sənət yoluna Şəki Dram Teatrından başladı. Onun uğuru Azərbaycanı deyil, dünyanı dolaşdı. Ustad sənətkar ömrünün sonuna kimi teatrımıza işıq tutdu.
Hüseynağa Atakişiyev teatra gələndə nə aktyor idi, nə də rejissor. O, teatrda işıqçı kimi işə başlayır. Tamaşalara işıq tutan gənc Hüseynağa bununla kifayətlənə bilməzdi. Çünki onun missiyası Azərbaycan teatrını işıqlandırmaq idi. O, bunu bacarır. Amma necə? Rejissor Vaqif Abbasovla birlikdə Şəki Dövlət Dram Teatrına yollanan Hüseynağa Atakişiyev içindəki işığını pyeslərə tutur. Mirzə Fətəlinin «Sərgüzəşti mərdi xəsis» pyesinə yeni ruh verən rejissor nə istedadına xəsislik edir, nə də sevgisinə. O, Şəki teatrını tək Azərbaycanda yox, dünyada tanıtır, beynəlxalq müsabiqələrdə birincilik qazandırır.
Hüseynağa Atakişiyev bizə həm də dahi Üzeyir bəyi yenidən sevdirən sənətkardı. Öz nuru, kübarlığı, üstəlik yüksək aktyorluq məharəti «Üzeyir ömrü»nü daha uğurlu edir. Bu da təsadüfi deyildi. Axı o, böyük rejissor Mehdi Məmmədovdan beş il aktyorluq dərsi almışdı. Onun üçün rolun böyüyü, kiçiyi yox idi. Yetər ki, xarakter maraqlı olsun. «Ac həriflər» teletamaşasında yaratdığı aktyor obrazı kimi.
Tale Hüseynağa Atakişiyevi Akademik Milli Dram Teatrına baş rejissor kimi gətirir. O, burada Maksim Qorkinin «Həyatın dibində» əsərini qoymaqla elə özü də həyatın dibinə sürüklənir. Şəki Teatrında qazandığı uğurlar xatirəyə çevrilir. «Böyük Romul», «Üç quruşluq opera», «Günah», «Yayda qartopu oyunu» tamaşaları belə onu xilas edə bilmir.
Milli Dram teatrından ayrılan rejissor çox keçmir ki, Dövlət Gənclər Teatrını yaradır. O, Yusif Səmədoğlunun «Qətl günü» romanını səhnəyə gətirməklə itirdiyi uğurlarını yavaş-yavaş qazanmağa başlayır. Ustad rejissor ötən əsrin 90-cı illərinin ən çətin günlərində bir-birindən maraqlı pyeslərlə teatrı, onun gənc aktyorlarını quruluş verdiyi tamaşalarla qoruyur. Hüseynağa Atakişiyev dramaturq Firuz Mustafanın «Qara qutu» pyesinə quruluş versə də premyerasını görmək ona nəsib olmur. Rejissorun teatrla bağlı arzuları qara qutudan çıxa bilmir. Amma bir təsəlli var. Hüseynağa Atakişiyev bacardığı qədər Azərbaycan teatrına işıq tuta bildi...
