Azərbaycan Televiziyası rejissor Ramiz Həsənoğlu haqqında film çəkir

8 Aprel, 17:56 Sosial mediada paylaşın:

Azərbaycan Televiziyası görkəmli rejissor, məşhur tele-tamaşaların müəllifi, Xalq artisti Ramiz Həsənoğlunun yubileyi münasibətilə film çəkir.  Topal Teymur, Salman bəy, Zəhra xalaqızı, Müşkünaz xanım, Mirzə Fətəli, Zərbəli, İzzət Nəfisli və neçə-neçə qəhrəman yenə ekranda görüşür. Onlar bu dəfə rejissor Ramiz Həsənoğlunun başına toplaşırlar. Axı baxmaqdan doymadığımız o sevimli qəhrəmanları ekrana çıxaran da elə Ramiz Həsənoğludur.

"Fotoqraf Əli bəyin fotostudiyası sizin qulluğunuzda həmişə hazırdır!», «Bu duptatlıq adama laaap ləzzət eləyir»... Ramiz Həsənoğlunun yaratdığı “Ordan-burdan” tamaşasının qəhrəmanları da çəkilişədədir.

Aktyorlar, qrim ustaları, operatorlar, rejissor... Bir sözlə, çəkiliş qrupu şərti adı “Uzun yolun bələdçisi” olan filmi yaratmaqla məşğuldular. Ramiz Həsənoğluna həsr olunan ekran əsərinin rejissoru Elnur Məmmədov, ssenari müəllifi isə Afaq Vasifqızıdır.

Filmin çəkilişləri Azərbaycan Televiziyası da daxil olmaqla müxtəlif məkanlarda, o cümlədən, Balaxanıda, Qobustanda, Şirvanşahlar Sarayında, Hüseyn Cavidin Ev muzeyində aparılıb. Bu dəfə isə kameralar, işıqlar Səməd Vurğunun Ev Muzeyində qurulmuşdur. 

Xalq artisti Cahangir Novruzov rejissor Ramiz Həsənoğlunun bir neçə tamaşasında bir-birindən maraqlı obrazlar yaradıb. Aktyor-rejissor söyləyir ki, Ramiz Həsənoğlu öz təfəkkürü, düşüncəsi ilə tamaşaçıların bilavasitə tərbiyəçisi olub.

“Estetik tərbiyəçisi olub. Onun bədii təfəkkürünün formalaşmasında, insanların, gənclərin düşüncə tərzinin bətnlənməsində Ramizin bəlkə də yaradıcılığnda əsas məqsəd qoymayıb, amma bir rejissor, bir düşüncə tərzi bu gün də görürük ki, sənətə dəyər verən bir nəsil var... Ramiz üçün bu pandemiya dövründə belə ordan qalxıb gəlmişəm, və bir daha olsa gələrəm”.

Filmdə həmçinin, Xalq artistləri Rasim Balayev, Afaq Bəşirqızı, Məbud Məhərrəmov, Hacı İsmayılov, Məmməd Səfa, İlham Namiq Kamal, Səidə Quliyeva, Əməkdar artistlər Sənubər İsgəndərli, Dilarə Əliyeva, Elman Rəfiyev və başqaları çəkiliblər.

 

Ülviyyə Heydərova

CANLI YAYIM