Şən və Hazırcavab "Bakılı oğlanlar"

1 Aprel, 16:09 Sosial mediada paylaşın:

«Bakılı oğlanlar» və ya «Parni iz Baku»… Azərbaycanın şən və hazırcavablar klubu. Zarafatları, iti cavablarıyla təkcə ölkəmizdə deyil, bütün MDB-də səs salan klubun Böyük Liqaya daxil olmasından 30 il ötür.

Şən və Hazırcavablar klubunun 1991-ci il mövsümündə Böyük Liqaya daxil olmaq üçün dörddəbir final oyunlarında birinci dəfə təmsil olunan «Bakılı oğlanlar» elə ilk çıxışdan münsifləri, tamaşaçıları heyrətləndirə bildi.

«Bakılı oğlanlar» 1988-ci ildə dörd komandanın əsasında yaradılıb. Şən və hazırcavab oğlanlar Anar Məmmədxanovun kapitanlığı ilə çox keçmədi ki, küləklər şəhərinin rəmzlərindən biri oldu.  Sarı pencək Bakının ən şən, ən hazırcavab oğlanlarını həm də ən yaraşıqlılar kimi tanıtdı. Onlar İçərişəhərin divarlarına hopmuş hazırcavablığı, Xəzərin pıçıldadığı lətifələri bütün dünyaya yaydılar.

Bu il «Bakılı oğlanlar» daha bir yubileyi qeyd edir. 20 il öncə Tahir və Cabir İmanov qardaşları «Planet Parni iz Baku» studiyasını, 2004-cü ildə studiyanın nəzdində «Planet parni iz Baku» KVN Teatrını yaratdılar.

Onlar təkcə zarafat etmirdi, yeri gələndə göz yaşlarını da saxlaya bilmirdilər. «Bakılı oğlar»ların söylədikləri hər söz çox keçmirdi dillər əzbərinə çevrilirdi. Çünki onlar həyatımıza güzgü tutmağı bacarırdı.

 

Ülviyyə Heydərova

CANLI YAYIM