Dünyamiqyasında nüfuzlu animasiya forumu “Cartoon Movie” (kartun muvi) öz işini yekunlaşdırıb. Forumda Avropanın ən yaxşı cizgi filmləri qiymətləndirilib.

Builki “Cartoon Movie” animasiya forumunda ən çox cizgi film istehsalına görə Fransa və İspaniya fərqlənib. Belə ki, 55 layihənin təqdim edildiyi festivalda 21 ekran işi Fransanın, 9-u isə ispaniyanın payına düşüb. Fransada animasiya sahəsinə göstərilən dövlət qayğısı, İspaniyada isə bu istiqamətdə vergilərin azaldılması buna əsas səbəb kimi göstərilir. Ümumiyyətlə, Avropada xüsusilə son illərdə animasiya sənayesi uğurla irəliləyir. Buna nümunə kimi, ABŞ və Fransada nəhəng şirkətlərdə işləmiş rejissor Serxio Pablosun “Klaus” adlı cizgi filmini göstərmək olar. “Klaus” ötən il “Oskar” mükafatına da namizd seçilmişdi. Cartoon Movie forumunda Rumıniya İtaliya və Almaniya kimi 3 ekran işi ilə təmsil olunub. “Qütb ayısı Framın sərgüzəştləri” adlı animasiya  rumın yazıçı Çezar Pertreskunun eyniadlı uşaq kitabı əsasında ekranlaşdırılıb. Forumda təqdim olunan animasiyaların ümumi büdcəsi 297 milyon avro təşkil edib. Cartoon Movie forumunda iştirak edən cizgi filmlərinin əksəriyyəti beynəlxalq müstəvidə yüksək qiymətləndirilib. Onların arasında bu il “Oskar” mükafatına namizəd seçilən “Canavarlar haqqında əfsanə” də var.

Xavər Zairova