Milli İncəsənət Muzeyində Xocalı soyqırımının 29-cu ildönümünə həsr edilən “Unudulmaz faciə” adlı sərgi keçirilib. Sərgidə rəngkarlıq, heykəltaraşlıq, qrafika olmaqla 25-dən çox rəssamın 60-dan çox əsəri nümayiş olunub. Sərgi Xocalı faciəsi qurbanlarına həsr olunub.

Sərgi əvvəlcə Xocalı soyqırımı qurbanlarının bir dəqiqəlik sükutla yad edilməsi ilə başlayıb. Tədbirdə çıxış edən mədəniyyət naziri Anar Kərimov 1992-ci il fevralın 25-dən-26-na keçən gecə Ermənistan silahlı qüvvələrinin bütün beynəlxalq hüquq normalarını pozaraq Xocalıya ağır hərbi texnika yeritdiyini, şəhərin əhalisinə qarşı misli görünməmiş qəddarlıqla divan tutduğunu diqqətə çatdırıb. Bildirib ki, həmin gecə qadın və uşaqlar da daxil olmaqla ümumilikdə 613 nəfər dinc azərbaycanlı vəhşicəsinə qətlə yetirilib, şəhər yerlə yeksan edilib. Bu faciə yalnız Azərbaycan xalqına qarşı deyil, bütün bəşəriyyətə qarşı yönəlmiş dəhşətli soyqırımıdır. Qeyd olunub ki, bu gün Xocalı qurbanlarının ruhları şaddır. Xalqımız bu günədək Xocalı faciəsini məyusluqla yad edirdi. Lakin Vətən müharibəsində Ali Baş Komandanın siyasi iradəsi və qətiyyəti nəticəsində müzəffər Ordumuz torpaqlarımızı geri aldı və bununla soyqırımı qurbanlarının da qisası alınmış oldu. Milli Məclisin Mədəniyyət komitəsinin sədri Qənirə Paşayeva Xocalı soyqırımını sənətin dili ilə də dünyaya çatdırmağa böyük ehtiyac olduğunu vurğulayıb. Diqqətə çadırılıb ki, belə sərgiləri xaricdə də təşkil etməli və Xocalı faciəsinin rəssamlarımızın yaradıcılığına təsirini nümayiş etdirilməlidir.

“Unudulmaz faciə” adlı sərgidə çıxış edənlər gələcəkdə belə layihələrin davam etməsinin vacibliyini vurğulayıblar. Sonra sərgiyə baxış keçirilib. Tədbirin bədii hissəsində Prezident təqaüdçüsü Orxan Hüseynovun  ifasında Fikrət Əmirovun “Poema-monoloq”undan fraqment səsləndirilib. 

Mahmud Yaqub