Xalq artisti Yalçın Rzazadə - Dayan, zaman, dayan!..

23 Fevral, 13:57 Sosial mediada paylaşın:

Xalq artisti Yalçın Rzazadə… «Bakı sabahın xeyir», «Durnalar», «Sevgi mahnısı», «O gözlər», «Gecə yaman uzundur»,  neçə-neçə mahnılara səsini bağışlayan sənətkar ötən gün dünyasını dəyişib.

Bakı uzun illərdir ki, Yalçın Rzazadənin səsi ilə «Sabahın xeyir!» sözünü eşidir. Şair İslam Səfərlinin sözləri, bəstəkar Emin Sabitoğlunun musiqisi və Yalçın Rzazadənin səsi elə bil Bakının dəli küləyini yatırır, Xəzərin ərköyün dalğalarını sakitləşdirir. Hamı ürəkdən «Bakı, sabahın xeyir!» demək istəyir. 

Bir zaman Yalçın Rzazadənin oxuduğu bu nəğmə xatirələri asta-asta qanadlandırır. Onun səsində nisgil də var, ümid də. Yalçın Rzazadə hər mahnını oxumasa da, hər əhval üçün dinləyicilərinə bir nəğmə bağışlayıb. Onun su kimi şəffaf səsindən təkcə «Durnalar» havada qanad saxlamayıb, müğənni məhz bu ifası ilə dinləyicilərin ürəyini titrədib.

Müğənninin sənət yolu hətta Azərbaycan Televiziyasından da keçib. Hələ Konservatoriyada oxuyarkən Azərbaycan Dövlət Teleradio Komitəsinə rejissor assistenti kimi fəaliyyətə başlayır. Məhz bu dövrdə Yalçın Rzazadə pianoçu, Əməkdar incəsənət xadimi Gülarə Əliyevanın rəhbərlik elədiyi «Dan ulduzu»na dəvət olunur.  

Yalçın Rzazadə zamanı şirin səsi ilə dayandıra da bilirdi. Elə ona görə də Cahangir Cahangirov, Tofiq Quliyev, Emin Sabitoğlu, Elza İbrahimova, Oqtay Kazımi, Ramiz Mirişli, Oqtay Rəcəbli, Eldar Mansurov və neçə-neçə bəstəkarlar ruhlarından qopan bir parçanı məhz onun səsinə etibar edirdi. Çünki Yalçın Rzazadə fərqli idi. Təkcə geyim tərzi ilə deyil, ifası, mədəniyyəti ilə seçilirdi.

Yalçın Rzazadə aktyor kimi kino kameranın önündə dayanmasa da ifası qəhrəmanların ruhuna hopurdu. O, səsi ilə Banuçiçəyin ürəyini  oxşadı, Baladadaşa təsəlli də verdi.

Əlvida Yalçın Rzazadə, əlvida sənətkar! Səsiniz bizə heç vaxt «Əlvida» deməyəcək. Həmişə təsəlli verəcək. 

 

Ülviyyə Heydərova

CANLI YAYIM