Misirin “Nil Mədəniyyət” dövlət telekanalında dahi Azərbaycan şairi və mütəfəkkiri Nizami Gəncəviyə həsr olunmuş veriliş yayımlanıb.

Verilişdə iştirak edən Tədqiqatçı-alim Seymur Nəsirov  qədim ərəb mənbələrinə istinadla Azərbaycanın elm və ədəbiyyat diyarı olmasından bəhs edib. Nizami Gəncəvinin əsərlərindən söz açan alim, müəllifin Şərq poeziyasının və fəlsəfi fikrinin incisi sayıldığını bildirİb. Həmçinin dahi şairin dünyaya göz açdığı Gəncə şəhəri ilə bağlı ərəb mənbələrindəki maraqlı faktlar barədə məlumat verib. Nəsirov misirli tamaşaçıların diqqətinə çatdırıb ki, Nizaminin “İsgəndərnamə” əsərində Misirin adı çəkilir, həmçinin Azərbaycanın xalq qəhrəmanı Koroğlunun da qılıncı “Misri” adlanır. Dahi şairin əsərlərini farsca yazmasına gəldikdə isə, tədqiqatçı-alim vurğulayıb ki, bu, həmin dövrdə ədəbi mühitdə ərəb və fars dillərinin hakim olması ilə əlaqədar idi. Verilişdə şairin humanizm ideyaları əsasında dünyada sülhün və tolerantlığın təbliği məqsədilə 2012-ci ildə təsis edilmiş Beynəlxalq Nizami Gəncəvi Mərkəzinin fəaliyyəti haqqında da məlumat verilib. Telekanalın efirində Azərbaycanın müasir həyatı, tarixi və mədəni irsi, xalçaçılıq və ipəkçilik sənətindən bəhs edən süjetlər də yayımlanıb.

Gülnaz Hacıyeva